„თბილისობის" დღესასწაულის ფარგლებში, 25 ოქტომბერს რიყეზე „ღვინის ქალაქი" მოეწყობა. აღნიშნულ საკითხთან დაკავშირებით, დღეს თბილისის მერიის, ღვინის ეროვნული სააგენტოსა და საქართველოს სომელიეთა ასოციაციის ხელმძღვანელების ერთობლივი პრეს-კონფერენცია გაიმართა.
თბილისის ვიცე-მერის ალექსანდრე მარგიშვილის განცხადებით, მერია მიესალმება მსგავსი სახის ღონისძიებების ჩატარებას. „ჩვენი მიზანია დედაქალაქის სტუმრებს მივაწოდოთ ინფორმაცია, თუ რამდენად უძველესი და დახვეწილი ღვინის კულტურაა საქართველოში" - განაცხადა ალექსანდრე მარგიშვილმა.
„ღვინის ქალაქის" ფარგლებში, რიყეზე „ღვინის სახლები" დაიდგმება, სადაც წარმოდგენილი იქნება სხვადასხვა კომპანიების მიერ წარმოებული ღვინოების სრული ასორტიმენტი, ინფორმაცია ღვინოებზე - ყურძნის ჯიშები, ტექნოლოგია, მთავარი მწარმოებლები, ისტორია და ა.შ. იქვე გაიმართება ღვინის დეგუსტაცია, გამარჯვებული კი "თბილისობაზე" დაჯილდოვდება. ფესტივალზე წარმოდგენილი ღვინოები ფასდაკლებით გაიყიდება.
„ღვინის ქალაქი" თეატრალიზებული ღვინის აღლუმით და თეატრ „ნაბადის" მსახიობების მონაწილეობით გაიხსნება. აღლუმი ჩაივლის მეტეხის ხიდზე „ღვინის ქალაქმდე", რომელიც საზეიმოდ გაიხსნება სიმბოლური გასაღებით. გასაღები კი ქალაქის მერს გადაეცემა.
იმავე დღეს "ღვინის ქალაქის" სცენაზე მოეწყობა ჯგუფ "ფრანი"-ს კონცერტი.
„ქართული ღვინის კონკურსი - თბილისი 2014"-ის შედეგების საზეიმო გამოცხადება და დაჯილდოვების ცერემონია 26 ოქტომბერს გაიმართება.