თბილისის მერიის ადმინისტრაციის უფროსის მოადგილე მარიამ შელეგია და საორგანიზაციო სამსახურის უფროსი თეა ედიშერაშვილი, ადმინისტრაციის სხვა ხელმძღვანელ პირებთან ერთად თბილისთან დაძმობილებული გერმანიის ქალაქ ზაარბრიუკენის მერიის წარმომადგენლებს შეხვდნენ.
გერმანული მხრიდან შეხვედრას ესწრებოდნენ ზაარბრიუკენის მერიის ეკონომიკური ხელშეწყობის, შრომის ბაზრის და საერთაშორისო თანამშრომლობის სამსახურის უფროსი ჰაიკე ბორნჰოლდტ-ფრიდი,ზაარბრიუკენის მერიის პარტნიორ ქალაქებთან ურთიერთობის განყოფილების უფროსი მარტინ შიონაიხი და ადგილობრივი თვითმართველობის განვითარება სამხრეთ კავკასიაში (GIZ) -ის მრჩეველი აკაკი რუხაძე.
მუშაობის ეფექტურობის გაზრდის მიზნით, მხარეებმა ერთიანი ხედვის შემუშავებაზე იმსჯელეს. აღინიშნა, რომ სტრუქტურულ ერთეულებს შორის თანამშრომლობის გაზრდის მიზნით, აუცილებელია ინფორმაციის გაცვლის მოქნილი სტანდარტისა და „ელექტრონული მთავრობის" პროექტის დანერგვა, ელექტრონული ვიზირების და საქმისწარმოების ერთიანი პროგრამის რეკონსტრუქცია/განახლება, უახლესი ევროპული სტანდარტებისა და ტექნოლოგიების დანერგვის გზით, ერთი ფანჯრის პრინციპით მოქალაქეთა სრულად ინფორმირება, მოქალაქეთა მომსახურების ცენტრის თანამედროვე ტექნიკით აღჭურვა, სატელეფონო მომსახურების ოპერატორების გადამზადება და სხვა.
როგორც შეხვედრაზე აღინიშნა, ზაარბრიუკენის წარმომადგენლობა ბოლო წლების განმავლობაში აქტიურად მონაწილეობდა მოქალაქეთა მისაღების, ცხელი ხაზის ოპერატორების გადამზადებისა და ზოგადად მათი მომსახურეობის გაუმჯობესების მიზნით სტანდარტების დანერგვის პროცესში.
