თბილისის მუნიციპალიტეტის საკრებულოში ადამიანის უფლებათა დაცვისა და სამოქალაქო ინტეგრაციის, ჯანდაცვისა და სოციალურ საკითხთა, ასევე გარემოს დაცვის კომისიების ერთობლივი სხდომა გაიმართა, რომელზეც დეპუტატებმა თბილისში არსებული დიდი ლილოს საყოფაცხოვრებო ნარჩენების პოლიგონის მიერ წარმოქმნილ პრობლემებსა და მათი აღმოფხვრის გზებზე იმსჯელეს.
ლილოს მოსახლეობასთან ერთად, სხდომას დედაქალაქის მერიის კეთილმოწყობის საქალაქო სამსახურის უფროსი ავთანდილ სუდაძე, მისი პირველი მოადგილე, მერიის ეკოლოგიისა და გამწვანების, სოციალური მომსახურებისა და კულტურის საქალაქო სამსახურების, ასევე შ.პ.ს. ,,თბილსერვის ჯგუფის", საქართველოს მწვანეთა მოძრაობის- ,,დედამიწის მეგობრები'', სახალხო დამცველის აპარატის, ჯანდაცვისა და გარემოს დაცვის სამინისტროების წარმომადგენლები ესწრებოდნენ.
სხდომას საკრებულოს ადამიანის უფლებათა დაცვისა და სამოქალაქო ინტეგრაციის კომისიის თავმჯდომარე გულიკო ზუმბაძე უძღვებოდა.
დეპუტატები და მოწვეული სტუმრები ერთხმად აღნიშნავდნენ, რომ დიდი ლილოს ტერიტორიაზე ნაგავსაყრელის აშენება და ექსპლოატაციაში შესვლა გარემოზე ზემოქმედების შეფასების პროცედურის დაცვის გარეშე მოხდა, რამაც სერიოზული პრობლემები შეუქმნა, როგორც ადგილობრივ მოსახლეობას, ასევე გარემოსა და საჰაერო მიმოსვლებს. ექსპერტების დასკვნით, აუცილებელია, აღნიშნული ნაგავსაყრელის კონსერვაცია და ადგილმონაცვლეობა.
2 საათიანი მსჯელობის შემდეგ დედაქალაქის საკრებულოს დეპუტატებმა მოამზადეს განკარგულების პროექტი, რომლის მიხედვითაც, თბილისის მერია ვალდებულია, არაუგვიანეს 10 ნოემბრისა, მოამზადოს პროგრამა ქ.თბილისის დიდი ლილოს საყოფაცხოვრებო ნარჩენების პოლიგონზე არსებული ვითარების მოწესრიგების, შემდგომში მისი კონსერვაციისა და ახალი ალტერნატიული ვარიანტის შემუშავების მიზნით. დეპუტატების თქმით, დადგენილების პირველი პუნქტით განსახორციელებელი ღონისძიებები უნდა შეესაბამებოდეს საყოველთაოდ მიღებულ პრაქტიკას და შესაბამისი იყოს ,,იკაოს''სტანდარტებისა და ევროგაერთიანების საბჭოს შესაბამისი დირექტივის (Council Directive 1999/31/EC of 26 April 1999 on the landfill of waste).
თბილისის მერიის კეთილმოწყობის საქალაქო სამსახურის წარმომადგენლების განცხადებით, საკრებულოს მიერ გამოცემული განკარგულების პროექტი სწორად ასახავს აღნიშნული პრობლემების მოგვარების გზებს.
მერიის შესაბამისი სამსახური მზადაა საკრებულოს მოცემულ ვადაში წარუდგინოს ნაგავსაყრელის მოწესრიგებისა და შემდგომში ჩასატარებელი სამუშაოების ხედვა.
კომისიები აღნიშნულ პროექტს საკრებულოს უახლოეს სხდომაზე წარადგენენ.
