გრიპი მწვავე ვირუსული ინფექციაა რომელიც ადვილად გადაეცემა ადამიანიდან ადამიანს. იგი ცირკულირებს მთელს მსოფლიოში და იწვევს ეპიდემიებს. მას აქვს უნარი დააინფიციროს ადამიანები ნებისმიერ ასაკობრივ ჯგუფში. სეზონურ ეპიდემიებთან ერთად, გრიპის ახალი ქვეტიპის აღმოცენებისთანავე შესაძლებელია გრიპის პანდემიის დაწყება.
გრიპი, ჩვეულებრივ, ჰაერის საშუალებით ვრცელდება დახველების ან დაცემინებისას, ასევე დაბინძურებული ხელებით. ადამიანებმა შესაძლებელია გაავრცელონ გრიპის ვირუსი ჯერ კიდევ მანამდე, სანამ გაიგებენ რომ ავად არიან, რომელიმე სიმპტომის გამოვლენამდე ერთი დღით ადრე და შემდგომი 5-7 დღის განმავლობაში.
როგორც წესი, გრიპის შემთხვევების უმეტესი რაოდენობა ყოველგვარი სპეციალიზებული სამედიცინო დახმარების გარეშე მთავრდება გამოჯანმრთელებით. თუმცა, გრიპი ზოგ შემთხვევაში შესაძლებელია გართულდეს, უფრო იშვიათად კი - გამოიწვიოს ლეტალური გამოსავალიც კი.
გრიპის სიმპტომები
სიმპტომები შესაძლოა მოიცავდეს:
დაავადების მოულოდნელი დაწყება;
მაღალი ცხელება (38 გრადუსზე მეტი);
საერთო ინტოქსიკაცია (თავის, კუნთებისა და სახსრების ტკივილი);
ხველა;
იშვიათად ყელის ტკივილი ან ცხვირის „გაჭედვა".
რეკომენდაციები გრიპით დაავადებულთათვის:
როგორც წესი, გრიპის შემთხვევების უმეტესი რაოდენობა ყოველგვარი სპეციალიზებული სამედიცინო დახმარების გარეშე მთავრდება გამოჯანმრთელებით. თუმცა, გრიპი ზოგ შემთხვევაში შესაძლებელია გართულდეს, უფრო იშვიათად კი - გამოიწვიოს ლეტალური გამოსავალიც კი
გართულებების განვითარების რისკ- ჯგუფებს მიეკუთვნებიან:
გულისა და სასუნთქი სისტემის ქრონიკული დაავადებით შეპყრობილნი;
დიაბეტით დაავადებულნი;
მცირე და ხანდაზმული ასაკი;
ორსულები
გრიპით გამოწვეული გართულებების თავიდან აცილების მიზნით, რეკომენდებულია:
დაავადებულებმა დაიცვან წოლითი რეჟიმი და ისეთი სიმპტომების გამოჩენისას, როგორიცაა:
სუნთქვის გაძნელება;
• ქოშინი;
• ციანოზი;
• ტკივილი გულმკერდის არეში;
• სისხლიანი ან მოვარდისფრო ნახველის გაჩენა;
• გახანგრძლივებული (3 დღეზე მეტი) მაღალი ცხელება (38 გრადუსზე მეტი);
• ბავშვებში - ღებინება ან ყლაპვის გაძნელება, კრუნჩხვები
სასწრაფოდ მიმართონ ექიმს, სპეციალიზებული სამედიცინო დახმარების აღმოჩენის მიზნით.
გრიპის გართულების თავიდან აცილების მიზნით, დაავადების პირველი ნიშნების გაჩენისთანავე, სპეციალიზებული სამედიცინო დახმარების მიწოდება რეკომენდებულია იმ ადამიანიებისთვის, რომელთაც აქვთ:
გულისა და სასუნთქი სისტემის ქრონიკული დაავადები;
• დიაბეტით არიან დაავადებულნი;
• არიან მცირე და ხანდაზმულ ასაკში;
• არიან ორსულად.
როგორ შევაჩეროთ გრიპის გავრცელება
გრიპის ვირუსისგან თავის დაცვის საუკეთესო საშუალებად აღიარებულია გრიპის საწინააღმდეგო სეზონური ვაქცინაცია.
გრიპის ფართო გავრცელებისას რეკომენდებულია არაპირდაპირი დაცვის საშუალებების გამოყენება, კერძოდ:
• უმჯობესია დაავადებული ადამიანები დარჩნენ სახლში: ამით დაიცავენ თავს მოსალოდნელი გართულებისგან, ხოლო საზოგადოებას - დაავადების გავრცელებისგან;
• ჯანმრთელებმაც და დაავადებულებმაც შეძლებისდაგვარად ხშირად დაიბანონ ხელები საპნითა და გამდინარე წყლით, რათა შემცირდეს ხელით ვირუსის გადატანის შესაძლებლობა;
რაც შეიძლება ხშირად გაანიავეთ საცხოვრებელი ადგილი;
• გამოიყენეთ სველი წესით დალაგება;
• იმ შემთხვევაში თუ დაავადება მიმდინარეობს მძიმედ და უჩვეულოდ ან დაავადებული მიეკუთვნება გრიპის გართულების მაღალი რისკის ჯგუფს, სასწრაფოდ მიმართეთ ექიმს, სპეციალიზებული სამედიცინო დახმარების მისაღებად.
ოქტომბერი 21, 2014სიახლეები