ყაზბეგის გამზირზე დაჭრილი პატრულის ჯანმრთელობის მდგომარეობა გაუმჯობესდა. თუმცა როგორც ,,ჯი-ეიჩ-ენთან" საუბარში რესპუბლიკური საავადმყოფოს საზოგადოებასთან ურთიერთობის ხელმძღვანელმა ნატა ხურციძემ განაცხადა, მისი მდგომარეობა მაინც სტაბილურად მძიმეა.
,,შეინიშნება დადებითი დინამიკა, თუმცა პაციენტის მდგომარეობა მაინც სტაბილურად მძიმეა", - აცხადებს ხურციძე.
,,ჯი-ეიჩ-ენის" კითხვაზე კონკრეტულად სხეულის რომელ ნაწილზე აღენიშნება ცეცხნასროლი ჭრილობები პატრულის თანამშრომლეს რესპუბლიკური საავადმყოფოს საზოგადოებასთან ურთიერთობის ხელმძღვანელი პასუხობს:
,, ამის თქმის უფლება არ გვაქვს, რადგან პაციენტისგან შესაბამისი ნებართვა არ გაგვაჩნია", -აცხადებს ხურციძე.
შეგახსენებთ, ყაზბეგის გამზირის N28-ში ლელა ბეჟანიშვილმა საპატრულო პოლიცია გამოიძახა და მის მეუღლე ბიძინა მურადაშვილსა და შვილს შორის წარმოქმნილი კონფლიქტის შესახებ აცნობა. საპატრულო პოლიციის ეკიპაჟი შემთხვევის ადგილზე გამოცხადდა.
საპატრულო პოლიციის თანამშრომლების ადგილზე მისვლისთანავე სადარბაზოში მოქალაქე ბიძინა მურადაშვილის მხრიდან განხორციელდა სროლა. სროლის შედეგად საპატრულო პოლიციის თანამშრომელმა სხეულის მრავლობითი ჭრილობები მიიღო. ბიძინა მურადაშვილის მიერ განხორციელებულ სროლას საპატრულო პოლიციის თანამშრომლის მეწყვილის მიერ საპასუხო გასროლა მოჰყვა. გასროლის შედეგად დაიჭრა მოქალაქე ბიძინა მურადაშვილი.
ბიძინა მურადაშვილს ჩაუტარდა ოპერაცია და მისი ჯანმრთელობის მდგომარეობა მძიმეა.
მომხდარ ფაქტზე გამოძიებას ქალაქ თბილისის პროკურატურის საგამოძიებო ნაწილი აწარმოებს.