დღეს თბილისის მუნიციპალიტეტის საკრებულოს ეკონომიკური განვითარების, საინვესტიციო პოლიტიკის და საერთაშორისო პოლიტიკის კომისიის სხდომაზე საქართველოს სომელიეთა ასოციაციის პრეზიდენტს და ქართული ღვინის საპატიო ელჩს, შალვა ხეცურიანს მოუსმინეს, რომელმაც კომისიას „თბილისობა 2014"-ის ფარგლებში განსახორცილებელი პროექტი „თბილისის ღვინის ფესტივალი 2014"-ის დეტალები წარუდგინა. მსვლელობა, რომელიც თეატრალიზებული ხასიათისაა, ევროპის მოედანზე დაიწყება და ღვინის ქალაქში საზეიმო გახსნით დასრულდება. აღნიშნული მსვლელობა ინფორმაციულ ხასიათსაც ატარებს, რაც თბილისელთა თვალწინ ღვინის ისტორიას გააცოცხლებს. ფესტივალი ორდღიანია და თბილისელებს უპრეცედენტო სანახაობას პირდება.
კომისიის თავმჯდომარემ ლევან დარახველიძემ და კომისიის წევრებმა დადებითად შეაფასეს აღნიშნული პროექტი. ფრაქცია „ქართული ოცნება-მრეწველების" თავჯდომარის ვლადიმერ ძნელაძის თქმით, მსგავსი ღონისძიება თბილისს არ ახსოვს და ნამდვილად მისასალმებელია, რასაც დანარჩენი დეპუტატებიც დაეთანხმნენ.
კომისიის სხდომას აგრეთვე ესწრებოდა თბილისის მერიის ეკონომიკური პოლიტიკის საქალაქო სამსახურის წარმომადგენელი, მარიამ მამულაშვილი. პროექტი „თბილისის ღვინის ფესტივალი 2014" თბილისის მერიისა, საქართველოს სომელიეთა ასოციაციისა და ღვინის ეროვნული სააგენტოს ორგანიზებით განხორციელდება.