თბილისის მთავრობამ, დღეს, შპს „თბილსერვისის" ანგარიში მოისმინა.
შეხვედრაზე „თბილსერვისის" ხელმძღვანელმა, გიორგი ბაგრატიონმა თბილისის მერს და მთავრობის წევრებს დედაქალაქში დასუფთავების კუთხით გაწეული სამუშაოებისა და სამომავლო გეგმების შესახებ ინფორმაცია გააცნეს.
როგორც შეხვედრაზე თბილისის მერმა, დავით ნარმანიამ განაცხადა, დღეს არსებული მდგომარეობა დამაკმაყოფილებელია, თუმცა არსებობს პრობლემური საკითხები, რომელიც უნდა მოგვარდეს. მათ შორისაა პიკის საათებში ქალაქის ვიწრო ქუჩებში ნაგვის გადამზიდავი მანქანების მოძრაობა, რაც საცობებს იწვევს. მისივე თქმით, მიმდინარეობს მუშაობა გრაფიკზე, რაც შესაძლებელს გახდის პრობლემის გადაჭრას.
დავით ნარმანიამ „თბილსერვისის" ხელმძღვანელობას დაავალა, გააქტიურონ საინფორმაციო კამპანია, რათა მოსახლეობამ ნარჩენები ქუჩაში არ დაყაროს. თბილისის მერის განცხადებით, ადმინისტრირება გამკაცრდა და ქუჩების დანაგვიანების შემთხვევაში მოქალაქეები და ორგანიზაციები კანონმდებლობის შესაბამისად დაისჯებიან.
დავით ნარმანიას თქმით, მომდევნო წელს იგეგმება ნაგავმზიდი მანქანების პარკის განახლება, ასევე მყარი ნარჩენებისთვის ურნების შეძენა. გარდა ამისა, თბილისის მერის განცხადებით, სამშენებლო ნარჩენებისთვის სპეციალური ტერიტორიები გამოიყოფა.
„გარეუბნებში უნებართვოდ იყრება სამშენებლო ნარჩენები, რაც ქალაქს აბინძურებს. ამიტომ, თბილისის დასავლეთ და აღმოსავლეთ ნაწილში, სამშენებლო ნარჩენებისთვის ორ ტერიტორიას გამოვყოფთ. მხოლოდ ამ ტერიტორიებზე იქნება ნარჩენების განთავსება შესაძლებელი", - განაცხადა დავით ნარმანიამ.
პარასკევის ტრადიციული შეხვედრების ფორმატში თბილისის მთავრობამ უკვე მოისმინა თბილისის სერვისის მიმწოდებელი კომპანების: სსიპ ქონების მართვის სააგენტოს, შპს „ჰერმესის", „სითი-პარკის", „თელასის", „ყაზტრანსგაზ-თბილისის", თბილისის სატრანსპორტო კომპანიის, outdoor.ge-ს, „GWP"-ს და „თბილისის მიკროავტობუსის" ხელმძღვანელების ანგარიშები და სამომავლო გეგმებზე იმსჯელა.
