თბილისის მუნიციპალიტეტის საკრებულოს დეპუტატმა ია მაკასარაშვილმა თბილისის მერიის სოციალური მომსახურებისა და კულტურის საქალაქო სამსახურის წარმომადგენლებს თბილისობის ღონისძიებებში მოსახლეობის მეტი ჩართულობისაკენ მოუწოდა.
"იმისათვის, რომ თბილისობის დღესასწაულმა უფრო საინტერესო და მასშტაბური ხასიათი მიიღოს, აუცილებელია მერიამ გაითვალისწინოს თბილისელების ინიციატივები. ამიტომ სასურველია, მოქალაქეებმა სოციალური ქსელით, ასევე მერიისა და საკრებულოს პორტალებით დღესასწაულამდე რამდენიმე კვირით ადრე შეძლონ მათი იდეებისა და პროექტების დაფიქსირება",- განაცხადა ია მაკასარაშვილმა.
დეპუტატის თქმით, შესაძლოა მოსახლეობის გარკვეული პრობლემების მოგვარება პირველ ეტაპზე ვერ მოხერხდეს, მაგრამ თუ თბილისელებს მიეცემათ საშუალება გამოიჩინონ თავი და ჩაერთონ საკუთარი ქალაქის ღონისძიებების მოწყობაში, ზეიმი ბევრად თბილ და საინტერესო გარემოში ჩაივლის.
ია მაკასარაშვილმა აღნიშნული ინიციატივა თბილისის საკრებულოს განათლებისა და კულტურის კომისიის სხდომაზე წამოაყენა. მერიის სოციალური მომსახურებისა და კულტურის საქალაქო სამსახურის წარმომადგენლებმა საკრებულოს დეპუტატის წინადადება დადებითად შეაფასეს და საკანონმდებლო ორგანოს წარმომადგენლებს ინიციატივის სამომავლოდ გათვალისწინებას დაჰპირდნენ.
