როგორც ქალი, ვგმობ იმას, რაც დღეს ილიას სახელობის უნივერსიტეტში მოხდა და ძალიან ვწუხვარ მომხდარის გამო! - ასე გამოეხმაურა შსს-ს საზოგადოებასთან ურთიერთობის სამსახურის ხელმძღვანელი ნინო გირგობიანი სოციალური ქსელით, ილიაუნიში მომხდარ მკვლელობას.
როგორც გიორგობიანი განმარტავს, მარია წივწივაძის მიმართვის საფუძველზე საქართველოს კანონმდებლობით გათვალისწინებული ყველა შესაბამისი მოქმედება ჩატარდა.
მისი თქმით, ოჯახური ძალადობის საკითხების განხილვაში ფსიქოლოგების, სოციოლოგებისა და არასამათვრობო სექტორის აქტიური ჩართულობა აუცილებელია და მათ მიერ მიწოდებულ ინფორმაციას სამინისტრო ყოველთვის ითვალისწინებს.
"შესაძლოა ზოგ შემთხვევაში არსებობს პრეტენზიები პოლიციის მიმართ იმის გამო, რომ არ ხდება სათანადო რეაგირება ოჯახური ძალადობის ფაქტებზე. დღეს მომხდარ ფაქტთან დაკავშირებით მინდა ვთქვა, რომ მარია წივწივაძის მიმართვის საფუძველზე ჩატარდა საქართველოს კანონმდებლობით გათვალისწინებული ყველა შესაბამისი მოქმედება. მარია წივწივაძემ მიმართა რუსთავის პოლიციას 22 სექტემბერს, მოხდა გასაუბრება ორივე მხარესთან და შედგა შესაბამისი ოქმი. მარია წივწივაძემ განაცხადა, რომ სურს მისმა მეუღლემ აღარ შეაწუხოს, წინააღმდეგ შემთხვევაში მოითხოვს შემაკავებელი ოქმის გამოწერას. შემდეგ 26 სექტემბერს მარია წივწივაძემ მიმართა დიდუბე-ჩუღურეთის პოლიციას, 29 სექტემბერს მოხდა მისი მეუღლის დაბარება პოლიციაში და გაფრთხილება რომ მის მიმართ გატარდებოდა კანონმდებლობით გათვალისწინებული ღონისძიებები.
შინაგან საქმეთა სამინისტროსთვის ქალთა მიმართ ძალადობის და ოჯახში ძალადობის წინააღმდეგ ბრძოლა ერთ-ერთი პრიორიტეტია. ამ მიმართულებით მიმდინარეობს მრავალმხრივი მუშაობა:
1. 2012 წლის მაისში, შსს-ს ინიციატივით, საქართველოს სისხლის სამართლის კოდექსში შევიდა ცვლილება, რომლის მიხედვითაც მოხდა ოჯახში ძალადობის კრიმინალიზაცია და ეს ქმედება თავისუფლებლების აღკვეთით დასჯადი გახდა.
2. შს მინისტრ ალექსანდრე ჭიკაიძის გადაწყვეტილებით უკვე რამდენიმე თვეა ტარდება ფართომასშტაბიანი ტრენინგი საქართველოს მთელ ტერიტორიაზე არსებული ყველა საპოლიციო დანაყოფის თანამშრომლებისთვის.
3. შსს-ში შექმნილია სპეციალური ჯგუფი, რომლის ფუნქციაში შედის თითოეულ ფაქტზე მონიტორინგის წარმოება და რეაგირების ადეკვატურობის ანალიზი. იმ შემთხვევაში, თუ გამოიკვეთება ხარვეზები, იგეგმება საგანგებო შეხვედრა ქალთა უფლებებზე მომუშავე არასამთავრობო და საერთაშორისო ორგანიზაციების წარმომადგენლებთან.
4. იგეგმება ოჯახში ძალადობის შესახებ ცნობიერების ასამაღლებელი კამპანიის დაწყება",- წერს გიორგობიანი.
