საჯარო რეესტრის ეროვნული სააგენტო „ინდივიდუალურ მეწარმეთა სარეგისტრაციო დოკუმენტაციის აღრიცხვა-სისტემატიზაციასა და ელექტრონული არქივის შექმნის პროექტს" იწყებს.
პროექტი უზრუნველყოფს მაღალი ხარისხის ელექტრონული მონაცემთა ბაზების წარმოებას. დამუშავებული და სისტემატიზებული ელექტრონული მონაცემების შექმნა ხელს შეუწყობს ბიზნეს-პროცესის გამარტივდებას როგორც შემსრულებელთათვის, ასევე ინფორმაციის მიღების მსურველი ნებისმიერი პირისათვის; სერვისის მომხმარებელთათვის შემცირდება სააგენტოს მხრიდან ხარვეზის დადგენის შემთხვევები, რაც გამოწვეულია არასისტემატიზებული არქივის ელექტრონული მონაცემთა ბაზების არსებობით. პროექტის განხორციელების შედეგად, შეიქმნება მონაცემთა ერთიანი ბაზა და სააგენტოს მიერ შეთავაზებული სერვისი გახდება უფრო სწრაფი და ეფექტური, გამარტივდება საქმისწარმოება.
ახალი პროექტი ორიენტირებულია 2010 წლამდე რეგისტრირებულ ინდივიდუალურ მეწარმეთა საარქივო დოკუმენტების მოწესრიგებასა და ელექტრონული არქივის შექმნაზე. 1995 წლიდან 2010 წლამდე რეგისტრირებული ინდივიდუალურ მეწარმეთა რაოდენობა მოცულობითია (საქართველოს მასშტაბით მათი რაოდენობა 276905 რეგისტრირებულ ინდივიდუალურ მეწარმეს შეადგენს).
საარქივო მასალების აღრიცხვა-სისტემატიზაცია მოიცავს - მასალის დაშლა-დალაგებას, ჯერ თარიღების მიხედვით, ხოლო შემდეგ მათი ადგილმდებარეობის განასაზღვრას, საარქივო დოკუმენტაციის საფუძველზე საჭირო კვლევისა და შესწორებების შეტანას ელექტრონულ მონაცემებში.
ელექტრონულ მონაცემთა ბაზაში განთავსების შემდეგ, აღრიცხული და სკანირებული ქაღალდის მასალა უსაფრთხოდ შენახვის მიზნით საჯარო რეესტრის ლილოს არქივში განთავსდება.
პროექტით გათვალისწინებული სამუშაობის შესასრულებლად სააგენტო ჯამში 45 ადამიანს დაასაქმებს.
პროექტი 2015 წლის ბოლოს დასრულდება.
