UNESCO-ს გენერალური დირექტორის ირინა ბოკოვას გადაწყვეტილებით გამოჩენილ ქართველ პიანისტს ელისო ბოლქვაძეს „UNESCO-ს ხელოვანი მშვიდობისთვის" (UNESCO Artist for Peace) წოდება მიენიჭება.
აღანიშნავია, რომ ეს პირველი შემთხვევაა საქართველოს ისტორიაში, როდესაც „UNESCO"-ს წოდება საქართველოს მიერ წარდგენილ კანდიდატს ენიჭება.
„UNESCO-ს ხელოვანები მშვიდობისთვის" არიან კულტურის დარგში მოღვაწე გამოჩენილი პიროვნებები, რომლებიც მზად არიან გამოიყენონ საკუთარი სახელი და სტატუსი ორგანიზაციის ღირებულებებისა და მთავარი მიზნების პოპულარიზაციისთვის. ძირითადად ეს არიან გამოჩენილი ადამიანები, ვინც თავისი წარმატებული კარიერის განმავლობაში უკვე დიდი წვლილი შეიტანეს UNESCO-ს კომპეტენციაში არსებული სფეროების განვითარებაში.
ელისო ბოლქვაძისთვის ამ მაღალი სტატუსის მინიჭების საფუძველი გახდა არა მარტო მისი პროფესიონალიზმი, არამედ წლების განმავლობაში გაწეული აქტიური საქველმოქმედო მოღვაწეობა მსოფლიოს სხვადასხვა კუთხეში, განსაკუთრებით კი ახალგაზრდა ნიჭიერი მუსიკოსების მხარდაჭერა ფონდ „ლირას" მეშვეობით.
ელისო ბოლქვაძის კანდიდატურა UNESCO-ს წარედგინა საქართველოს საგარეო საქმეთა მინისტრის, საქართველოს UNESCO-ს ეროვნული კომისიის პრეზიდენტის, მაია ფანჯიკიძის მიერ ა.წ. ივლისში.
ტიტულის მინიჭება მოხდება ოფიციალურ ცერემონიაზე UNESCO-ს სათაო ოფისში, ქ.პარიზში. საგარეო საქმეთა მინისტრი, მაია ფანჯიკიძე ტელეფონით ესაუბრა მუსიკოსს, მოულოცა ეს მნიშვნელოვანი წარმატება და მისი სტატუსის მანდატით გათვალისწინებულ საქმიანობაში მხარდაჭერა აღუთქვა.
დღეისათვის „UNESCO-ს ხელოვანი მშვიდობისთვის" სტატუსს ატარებს მსოფლიოს 54 ხელოვანი. მათ შორის ისეთი გამოჩენილი მოღვაწეები, როგორიცაა ხოაკინ კორტესი, სელინ დიონი, ვლადიმირ სპივაკოვი, დანილო პერესი, მარკუს მილერი და სხვა.
საქართველოს საგარეო საქმეთა სამინისტროსა და საქართველოს იუნესკოს საქმეთა ეროვნული
