15 ოქტომბერს საგარეო საქმეთა სამინისტროში ჰანირიხ ბიოლის ფონდისა და სამინისტროს ერთობრივი პროექტის „50 ქალი საქართველოდან" პრეზენტაცია გაიმართა. გამოფენების ციკლი ითვალისწინებს ჰაინრიჰ ბიოლის ფონდის მიერ შექმნილი ექსპოზიციის მსოფლიოს სხვადასხვა ქვეყანაში წარდგენას საქართველოს დიპლომატიური წარმომადგენლობების მიერ. ექსპოზიცია „50 ქალი საქართველოდან" ეძღვნება XIX და XX საუკუნეების ქართველ და ევროპელ საზოგადო მოღვაწე ქალებს, რომლებმაც ქართული კულტურისა და საზოგადოებრივი ცხოვრების განვითარებაში საკუთარი წვლილი შეიტანეს. გამოფენა 50 ფოტოსა და საარქივო, ბიოგრაფიულ მასალას აერთიანებს 50 გამოჩენილი ქალის ცხოვრებისა და მოღვაწეობის შესახებ.
პროექტის პრეზენტაციას საგარეო საქმეთა მინისტრის მოადგილე, თამარ ბერუჩაშვილი და ჰაინრიხ ბიოლის ფონდის სამხრეთ კავკასიის რეგიონალური ბიუროს დირექტორი ნინო ლეჟავა დაესწრნენ.
როგორც საგარეო საქმეთა მინისტრის მოადგილემ, თამარ ბერუჩაშვილმა აღნიშნა, საგარეო საქმეთა სამინისტრო გამუდმებით ცდილობს იპოვოს ახალი გზები და საშუალებები, რათა მსოფლიოს უკეთ გააცნოს ქართული კულტურა, ისტორია და ეს პროექტიც ამას ემსახურება. „ჩვენ ჰაინრიხ ბიოლის სამხრეთ კავკასიის ბიუროსთან ერთად აქტიური თანამშრომლობით ჩამოვაყალიბეთ ექსპოზიცია „50 ქართველი ქალი", რომელიც წელს დაიწყებს მოგზაურობას ევროკავშირის წევრი ქვეყნების სხვადასხვა დედაქალაქებში. ეს ღონისძიება 2015 წლის განმავლობაშიც გაგრძელდება. ეს არის კიდევ ერთი ხაზგასმა და წარმოჩენა საქართველოს ისტორიის ფურცლებისა, რომელიც დეტალურად ასახავს ქალების როლს, მოღვაწეობას და მნიშვნელობას ქართული საზოგადოებისათვის მე-19 საუკუნის ბოლოსა და მე-20 საუკუნის დასაწყისში"-განაცხადა თამარ ბერუჩაშვილმა.
ჰაინრიხ ბიოლის ფონდის სამხრეთ კავკასიის რეგიონალური ბიუროს დირექტორის განცხადებით მნიშვნელოვანია, რომ საგარეო საქმეთა სამინისტროს და საზღვარგარეთ საქართველოს საელჩოების დახმარებით მოხდება ამ ექსპოზიციის პოპულარიზააცია საერთაშორისო ასპარეზზე.
საგარეო საქმეთა სამინისტროს ინიციატივითა და საზღვარგარეთ საქართველოს დიპლომატიური წარმომადგენლობების საშუალებით, საქართველოსთვის მოღვაწე ქალების ამსახველი ფოტო-გამოფენები მსოფლიოს სხვადასხვა ქვეყანაში 2014-2015 წლებში გაიმართება.
აღსანიშნავია, რომ სლოვაკეთში საქართველოს საელჩოსა და ქალაქის მუნიციპალიტეტის ორგანიზებით გამოფენა „50 ქალი საქართველოდან" უკვე გაიმართა ქ. ბრატისლავაში. მიმდინარე წლის 6 ნოემბერს კი გამოფენა სტოკჰოლმში გაიხსნება, სადაც ქალთა მოძრაობისა და ისტორიაში ქალთა როლის შესახებ პრეზენტაციას შვედეთის სამეფოში საქართველოს ელჩი გამართავს. ღონისძიებას დაესწრებიან ქალთა უფლებების დამცველი ორგანიზაციების წარმომადგენლები და შვედეთის რიკსდაგის ქალი დეპუტატები. მიმდინარე წლის ბოლომდე დაგეგმილია გამოფენის გერმანიასა და ბელგიაში ორგანიზება.
გამოფენების ციკლს ორგანიზებას უწევს საგარეო საქმეთა სამინისტრო, ხოლო პროექტი განხორციელებულია ჰაინრიხ ბიოლის ფონდის მიერ.
მასალის გამოყენების პირობები
