თევდორე მღვდლის 13-ში, ხანძრის შედეგად დაზარალებულ დევნილებს ბინის ქირით თბილისის მერია სარეზერვო ფონდიდან უზრუნველყოფს იმ დრომდე, ვიდრე არ აღდგება ხანძრით დაზიანებული საცხოვრებელი შენობის ინფრასტრუქტურა.
დიდუბის რაიონის გამგებლის ირმა ზავრადაშვილის თქმით, თბილისის მერია დაფარავს ასევე დაზარალებულთა რამდენიმე დღით სასტუმროში განთავსების ხარჯებს, ვიდრე არ გამოინახება მათთვის საცხოვრებელი ფართები.
მისივე თქმით, დაზიანებული შენობის აღდგენა დაიწყება მას შემდეგ, რაც დაითვლება ხარჯები, რის შემდეგაც, კანონმდებლობის თანახმად, ამხანაგობის თანადაფინანსებით, ხარჯების 85 %-ს თბილისის მერია, 15%-ს კი ოკუპირებული ტერიტორიებიდან, იძულებით გადაადგილებულ პირთა, განსახლების და ლტოლვილთა სამინისტრო გაიღებს.
თევდორე მღვდლის 13-ში, ხანძრის შედეგად დაზარალებული 42 ოჯახი ამჟამად დიდუბის რაიონში მდებარე სამ სასტუმროშია განთავსებული. აღნიშნილი გადაწყვეტილება 14 ოქტომბერს, დიდუბის რაიონის გამგეობაში გამართულ თათბირზე მიიღეს. თათბირს ესწრებოდნენ თბილისი მერის მოადგილეები გიორგი სოლომონია და ალუდა გოგლიჩიძე, განსახლებისა და ლტოლვილთა მინისტრის მოადგილეები გრიგოლ გიორგაძე და შოთა რეხვიაშვილი, დიდუბის რაიონის გამგებელი ირმა ზავრადაშვილი, მისი მოადგილე რამაზ ბლუაშვილი, საკრებულოს დიდუბის რაიონის მაჟორიტარი დეპუტატი ვლადიმერ ძნელაძე.
გუშინვე, გამგეობის ორგანიზებით ლტოლვილებს საკვები მიეწოდათ.
