თბილისის მუნიციპალიტეტის საკრებულოს ჩუღურეთის რაიონის მაჟორიტარი დეპუტატის რიმა ბერაძის ბიურო მოსახლეობის პრობლემების მოგვარებას განაგრძობს.როგორც რიმა ბერაძემ აღნიშნა, ბიურო აქტიურად თანამშრომლობს არასამთავრობო ორგანიზაციასთან "ჩუღურეთელი" , რომელმაც დეტალურად შეისწავლა ადგილობრივი მოსახლეობის პრობლემები და დეპუტატის ჩართულობით ახორციელებს მათ მოგვარებას.
რიმა ბერაძის თქმით, ბიუროში შეიქმნა სპეციალური ბაზა, სადაც აღრიცხულია მოსახლეობის ის ნაწილი, რომლებსაც დავალიანების გამო გათიშული აქვთ ელექტროენერგია. აღნიშნულიდან გამომდინარე 67 მოქალაქეს უკვე მოეხსნა კომუნალური დავალიანება, რაც მთლიანობაში 326 ათას ლარს შეადგენს.
"ანალოგიური მდგომარეობა გვაქვს წყალთან დაკავშირებით და მინდა მადლობა გადავუხადო "GWP"-ს წარმომადგენლებს, რომლებიც ოპერატიულად წყვეტენ ჩვენს მიერ მიწოდებულ პრობლემას. ასევე ძალიან კარგი შედეგები გვაქვს გაზიფიცირებასთან დაკავშირებით. ჩუღურეთის რაიონში არცეთი სოციალური საცხოვრისი არ დარჩება ბუნებრივი აირის გარეშე. ჩვენ აქტიურად ვთანამშრომლობთ გამგეობასთან და მაქსიმალურად ვცდილობთ, შევასრულოთ წინასაარჩევნო დაპირებები" , - განაცხადა რიმა ბერაძემ.
თბილისის მუნიციპალიტეტის საკრებულოს ჩუღურეთის რაიონის მაჟორიტარი დეპუტატის თქმით, ბიუროს დახმარებით ასევე დასაქმდა 37 ადამიანი.
რიმა ბერაძემ დღეს საკუთარ ბიუროში მოქალაქეთა ტრადიციული მიღება გამართა. მას შემდეგ, რაც ჩუღურეთის ბიურომ ფუნქციონირება დაიწყო, დაახლოებით 6000 მოქალაქის განცხადებაა შესული, რომელთა უმეტესი ნაწილი უკვე დაკმაყოფილდა.