დღეს, თბილისის მუნიციპალიტეტის საკრებულოს ჩუღურეთის რაიონის მაჟორიტარმა დეპუტატმა რიმა ბერაძემ საკუთარ ბიუროში მოქალაქეთა ტრადიციული მიღება განსხვავებულ ფორმატში გამართა, რომელსაც თბილისის საკრებულოს იურიდიულ საკითხთა კომისიის თავმჯდომარე თედო კობახიძე დაესწრო და დეპუტათთან ერთად მოქალაქეების პრობლემებს გაეცნო. ბიუროში ასეთი შეხვედრები მოქალაქეებთან ყოველ ოთხშაბათს იმართება და მას შემდეგ, რაც ჩუღურეთის ბიურომ ფუნქციონირება დაიწყო, დაახლოებით 6000 მოქალაქის განცხადებაა შესული, რომელთა უმეტესი ნაწილი უკვე დაკმაყოფილდა. ასევე თბილისის მუნიციპალიტეტის საკრებულოში დამკვიდრდა ტრადიცია, რომ ოთხშაბათის მიღებებზე სხვადასხვა რაიონის მაჟორიტარების ბიუროებში მიდიან საკრებულოს პროპორციული სიით არჩეული დეპუტატები და მაჟორიტარებთან ერთად ხვდებიან მოქალაქეებს.
საკრებულოს იურიდიულ საკითხთა კომისიის თავმჯდომარე, თედო კობახიძე აღნიშნავს, რომ მსგავსი ტრადიციის დამკვიდრება პროპორციული სიით არჩეული დეპუტატების მოქალაქეებთან უფრო მჭიდრო ურთიერთობას და პროცესში ჩართულობას უზრუნველჰყოფს.
„მოგეხსენებათ, თბილისის საკრებულოს მაჟორიტარი დეპუტატები ყოველ ოთხშაბათს საკუთარ ბიუროებში ატარებენ მოქალაქეთა მიღებას. სულ ახლახანს კი დავნერგეთ ტრადიცია, რომ პროპორციული სიით არჩეული დეპუტატებიც მივიდნენ ოთხშაბათის ტრადიციულ მიღებებზე, მაჟორიტარებთან ერთად შეხვდნენ მოქალაქეებს და უშუალოდ გაეცნონ მათ პრობლემებს. ეს პროცესი უზრუნველჰყოფს ჩვენს მაქსიმალურ ჩართულობას მოქალაქეებთან ურთიერთობაში, რათა ჩვენ, პროპორციული სიით არჩეულმა დეპუტატებმა არა მხოლოდ მაჟორიტართა ბიუროებიდან მივიღოთ ინფორმაცია მოქალაქეების პრობლემების შესახებ, არამედ პირადად შევხვდეთ ჩვენს თანამოქალაქეებს და ამ გზით ვიყოთ ინფორმირებულები ქალაქში არსებულ მწვავე საკითხებთან დაკავშირებით", - აღნიშნა თედო კობახიძემ.
რაც შეეხება რიმა ბერაძის ბიუროს, მოქალაქეები დეპუტატს ძირითადად, სოციალური ხასიათის პრობლემებით მიმართავენ. ასევე ბევრია ჯანდაცვასთან დაკავშირებული, საყოფაცხოვრებო, ინფრასტრუქტურული და ერთჯერადი ხასიათის პრობლემებიც.
ჩუღურეთის რაიონის მაჟორიტარი დეპუტატი რიმა ბერაძე ამომრჩეველს პირადად ხვდება, ესაუბრება მათ და შესაძლებლობის ფარგლებში უწევს დახმარებას. ასე მაგალითად, დღეს დილით ბიუროში გახსნისთანავე შევიდა ორი განცხადება. საქმე ჯავახიშვილისა და ნინოშვილის ქუჩებზე წყალსადენ მილთან დაკავშირებულ ავარიულ მდგომარეობას ეხებოდა. რიმა ბერაძის თქმით, იგი დაუყოვნებლივ დაუკავშირდა გამგეობას და აღნიშნული პრობლემა უკვე დილის 11 საათისთვის ბოლომდე იყო მოგვარებული.
ასევე მოქალაქეებთან შეხვედრების და მათი პრობლემების გაცნობის შედეგად აღმოიფხვრა ინფრასტრუქტურული პრობლემების საკმაოდ დიდი ნაწილი. კერძოდ კი რაიონის თორმეტ ქუჩაზე განხორციელდა გზების რეაბილიტაციის სამუშაოები და ოცდათხუთმეტ ეზოში დაიგო ასფალტის საფარი.
მოქალაქეები ბიუროს საკმაოდ ხშირად ჯანდაცვის პრობლემებით მიმართავენ. აღსანიშნავია, რომ ამ ნუსხაში ექვსი ძვირადღირებული ოპერაციის, რამოდენიმე ძვირადღირებული სამედიცინო გამოკვლელვის, ძვირადღირებული მედიკამენტური მკურნალობისა და მედიკამენტების ერთჯერადად შეძენასთან დაკავშირებული 70-მდე განცხადება შევიდა, რომლებიც რაიონის მაჟორიტარი დეპუტატის შუამდგომლობით დაფინანსდა.
მოქალაქე თეა ხრიგული, რომელიც ამჯერად ბიუროში დედის ძვირადღირებული ოპერაციის დაფინანსების თხოვნით მივიდა, მადლობას უხდის რიმა ბერაძეს აქამდე გაწეული დახმარების გამო,
„მოვედი მადლობის სათქმელად, რადგან ქალბატონმა რიმამ ჩემი ოჯახის პრობლემები ადრეც გულთან მიიტანა და უდიდესი დახმარება გაგვიწია. ამჯერადაც გვაქვს იმედი, რომ დედას, რომელსაც მძიმე სიმსივნური დაავადებისათვის საკმაოდ ძვირადღირებული ოპერაციის დაფინანსება ესაჭიროება, ქალბატონი რიმა ძალ-ღონეს არ დაიშურებს და გაგვიწევს დახმარებას",- განაცხადა თეა ხრიგულმა.