დედაქალაქის საკრებულოს ურბანული დაგეგმარებისა და საქალაქო მეურნეობის კომისიაზე შ.პ.ს. "ჰერმესის'' ხელმძღვანელს მოუსმინეს.
მიხეილ ძაგანიამ დეპუტატებს სარიტუალო მომსახურების კომპანიის საქმიანობასთან დაკავშირებით ანგარიში გააცნო და სამომავლო გეგმებზე ისაუბრა.
"ჰერმესის'' ხელმძღვანელმა კომპანიის ელექტრონული და ონლაინ სერვისის გაუმჯობესებულ სისტემაზე გაამახვილა ყურადღება და აღნიშნა, რომ მოქალაქეებს საშუალება აქვთ სახლიდან გაუსვლელად დარეგისტრირდნენ შ.პ.ს. "ჰერმესი"-ს ოფიციალურ ვებ-გვერდზე www.hermes.ge, შეავსონ ყველა სახის ელექტრონული განაცხადი, ატვირთონ საჭირო დოკუმენტაცია და მიიღონ ყველა სარიტუალო პროდუქცია და სერვისები, რაც დაკრძალვის ორგანიზებასთანაა დაკავშირებული.
მიხეილ ძაგანიამ ასევე ხაზი გაუსვა სამართლებრივ და ინფრასტრუქტურულ პრობლემებს, რომლის მოგვარებაზეც შესაბამის სამსახურებთან მიმდინარეობს მუშაობა.
ანგარიშის მოსმენის შემდეგ სხდომა კითხვა - პასუხის რეჟიმში წარიმართა.
საკრებულოს დეპუტატები ძირითადად მომსახურების ტარიფებით დაინტერესდნენ. როგორც საკრებულოს ურბანული დაგეგმარებისა და საქალაქო მეურნეობის კომისიის თავმჯდომარემ აღნიშნა, გადასახადი ხელოვნურადაა გაზრდილი და აუცილებელია მათი გადახედვა.
"შეხვედრისას გამოიკვეთა, რომ ტარიფები ხელოვნურადაა გაზრდილი, ამიტომ ჩვენ დავავალეთ ახალ ხელმძღვანელობას აღნიშნულ საკითხთან დაკავშირებით, უმოკლეს ვადაში მოგვაწოდოს კომპანიის ხედვა. შემდგომი შეხვედრა ბევრად მკაცრი იქნება, რადგან არსებობს საკითხები, რომლებიც შესაძლოა ბევრად უფრო მისაწვდომი გავხადოთ მოსახლეობისთვის",- განაცხადა გოჩა ბაბუნაშვილმა.
დეპუტატები უნებართვო სასაფლაოების მდგომარეობითაც დაინტერესდნენ. როგორც მიხეილ ძაგანიამ განმარტა, ორგანიზაციას მართვაში გადმოცემული აქვს თბილისის 31 საქალაქო სასაფლაო, რაც შეეხება შემოერთებულ სოფლებს , "ჰერმესის" ხელმძღვანელის თქმით, მოსახლეობა მათი კომპანიისთვის გადმოცემის წინააღმდეგია, რაზეც სამართლებრივი ღონისძიებებია გასატარებელი.
დეპუტატების განცხადებით, აუცილებელია კომპანიამ განსაზღვროს საკუთარი პოლიტიკა, ჩამოაყალიბოს ხედვები და მოწონების შემთხვევაში საკრებულო ყველაფერს გააკეთებს იმისათვის, რომ ცვლილება საკანონმდებლო დონეზე განახორციელოს.
ამის გარდა, „ჰერმესის" ხელმძღვანელობას სასაფლაოებთან მისასვლელი გზების კეთილმოწყობა, სასაფლაოების მიმდებარე ტერიტორიაზე სასმელი წყლის პრობლემის აღმოფხვრა, სანიტარული ნორმების დაცვის სისტემის მოწყობა და მიმდებარე ტერიტორიის დასუფთავების საკითხის მოგვარება დაევალა.