აფხაზეთის ავტონომიური რესპუბლიკის მთავრობის ორგანიზებითა და კომპანია ,,EUROCOM INVESTMENT'' დაფინასნებით, აფხაზეთიდან და ცხინვალის რეგიონიდან დევნილი ქართველი, ეთნიკურად აფხაზი, ოსი და ბავშვები შერეული ოჯახებიდან ,,მშვიდობის მარათონის" პროექტის ფარგლებში სლოვაკეთის ქალაქ ბეშენოვაში ხვალ, ქუთაისის აეროპორტიდან გაემგზავრებიან. პროექტი მხარდამჭერები არიან საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო, ქალაქ ბათუმის მერია, თბილისის ვაკის გამგეობა, ქ. გორის მერია და მუნიციპალიტეტი.
ბავშვებს დღეს, 22:00 საათზე თბილისიდან ( ყაზბეგის #42) აფხაზეთის ავტონომიური რესპუბლიკის მთავრობის წევრები გააცილებენ.
ახალგაზრდულ დელეგაციას მასპინძლობას გაუწევს სლოვაკეთში მოღვაწე ქართველი ბიზნესმენი და ქველმოქმედი კომპანია ,,EUROCOM INVESTMENT"-ის დამფუძნებელი ნოდარ გიორგაძე. ახალგაზრდული დელეგაციის შემადგენლობაში არიან სხვადასხვა საგანმანათლებლო კონკურსებსა და სპორტულ შეჯიბრებებში, ასევე პროექტის ,,ჩემი აფხაზეთი"და ,,ომის გარეშე" გამარჯვებული ბავშვები, ევროპის ახალგაზრდული ოლიმპიური ფესტივალი - თბილისი 2015 მომავალი მონაწილეები და წარმატებული ხელოვანი ახალგაზრდები. 40 ქართევლი, აფხაზი და ოსი ბავშვი ერთი კვირის განმავლობაში მონაწილეობას მიიღებენ კულტურულ-საგანმანათლებლო და სპორტულ-სარელაქსაციო ღონისძიებებში.
პროექტის მიზანია ხელი შეუწყოს კულტურათა შორის დიალოგს- ქართველი, აფხაზი და ოსი მოზარდების დამეგობრებასა და ახალგაზრდების როლის გაზრდას მშვიდობის მშენებლობაში.
დევნილი ბავშვები საქართველოში 21 ოქტომბერს დაბრუნდებიან.
