12 ოქტომბერს, 12:30 საათზე, სამების საკათედრო ტაძრის ახალგაზრდულ ცენტრში გაიმართება სასკოლო კონკურსი „წიგნის მეგობრები 2014" პრეზენტაცია. უწმინდესი და უნეტარესი, სრულიად საქართველოს კათოლიკოს პატრიარქი ილია II პროექტის ორგანიზატორებსა და კონკურსის მონაწილეებს შეხვდება და დალოცავს.
საპატრიარქოს ახალგაზრდული მოძრაობა „დავითიანნის" ინტელექტუალური კლუბი „წიგნის მეგობრების" ორგანიზებით კონკურსი უკვე მეორე წელია მიმდინარეობს. პროექტის მიზანია საქართველოს ახალგაზრდა თაობაში წიგნის კითხვისადმი ინტერესის გაზრდა და მათი ინტელექტუარ-ანალიტიკური აზროვნების განვითარების ხელშეწყობა. ამ ეტაპზე კონკურსში მონაწილეობას 16 სკოლა მიიღებს.
პატრიარქთან ერთად კონკურსის პრეზენტაციას განათლებისა და მეცნიერების სამინიტროს, ქ. თბილისის საკრებულოს და სპორტისა და ახალგაზრდობის სამინისტროს წარმომადგენლებიც დაესწრებიან, რომლებიც პროექტში საკუთარ ჩართულობაზე ისაუბრებენ.
ღონისძიების დასასრულს ასევე მოხდება „წიგნის მეგობრების" Facebook თამაშის, „ზაფხული და წიგნის" გამარჯვებულების დაჯილდოვებაც. გამარჯვებულ კონკურსანტებს პროექტის პარტნიორები: გამომცემლობა „დიოგენე", თუმანიშვილის თეატრი და ესთეტიკური მედიცინის ცენტრი La Belle Medical-ი დააჯილდოვებენ. „წიგნის მეგობრებისგან" კი გამარჯვებულებს Kindle-ები, ბეჭდური წიგნები და სხვადასხვა სამახსოვრო პრიზები გადაეცემათ.