თბილისის მუნიციპალიტეტის საკრებულოში ურბანული დაგეგმარებისა და საქალაქო მეურნეობის კომისიის სხდომა გაიმართა, რომელზეც დეპუტატებმა დედაქალაქის მერიის ზედამხედველობის საქალაქო სამსახურის ანგარიში მოისმინეს.
როგორც გეგი ნიჟარაძემ მოხსენებაში აღნიშნა, წინა ხელისუფლების პერიოდში უამრავი უკანონო სამშენებლო ნებართვის გაცემის გამო დღესაც მახინჯდება ქალაქის ფასადი. ამასთან, ირღვევა მოსახლეობების უფლებებიც, რადგან საცხოვრებელი კორპუსები,ძირითადად, დარღვევით შენდება, რაც მათ ექსპლოატაციაში მიღებას შეუძლებელს ხდის.
სხდომა საკანონმდებლო ორგანოს მაჟორიტარი დეპუტატების ინიციატივით ჩაინიშნა.
თავდაპირველად, დეპუტატებმა კითხვები საკუთარ უბნებში არსებულ პრობლემებთან დაკავშირებით დასვეს, რის შემდეგაც გამოიკვეთა, რომ აღნიშნული საკითხები საკანონმდებლო დონეზეა მოსაწესრიგებელი.
კომისიის წევრები ჯარიმების ამინისტიის ინიციატივითაც გამოვიდნენ და დედაქალაქის ზედამხედველობის საქალაქო სამსახურს მოსახლეობის მიმართ მეტი ლოიალური დამოკიდებულებისაკენ მოუწოდეს.
დღევანდელ სხდომაზე დეპუტეტებმა ლოჯიების თემაც განიხილეს და აღნიშნეს, რომ საკითხთან დაკავშირებით აუცილებელია მკაცრი მონიტორინგის ჩატარება და დარღვევების არსებობის შემთხვევაში, მიდგმული ნაგებობის დემონტაჟის დაუყონებლივი განხორციელება.
მაჟორიტარი დეპუტატების განცხადებით, ძირითად პრობლემას მოსახლეობის არაინფორმირებულობაც ქმნის.
კომისიის წევრების თქმით, მოსახლეობაში ინფორმირებულობის გაზრდის მიზნით, მნიშვნელოვანია სოციალური რეკლამის მომზადება და მისი მასობრივი ინფორმაციის სხვადასხვა საშუალებებით გავრცელება.
ურბანული დაგეგმარებისა და საქალაქო მეურნეობის კომისიის სხდომა ორ საათს გაგრძელდა.
როგორც კომისიის თავმჯდომარემ სხდომის შეჯამებისას აღნიშნა, დედაქალაქის საკრებულო უკანონო მშენებლობებზე მკაცრ მონიტორინგს განახორციელბს.
"საკრებულო მზადაა დეტალურად განიხილოს მერიის ზედამხედველობის საქალაქო სამსახურის ის ინიციატივები, რომლებიც საკანონმდებლო ცვლილებებს გულისხმობს. ველოდებით მათ წინადადებებს და ვფიქრობ, საბოლოოდ შევჯერდებით ისეთ გადაწყვეტილებაზე, რომელიც აღკვეთავს უკანონო მშენებლობებს და ჩვენს მომავალ თაობას თბილისის იერსახეს შევუნარჩუნებთ ",- განაცხადა გოჩა ბაბუნაშვილმა.
ურბანული დაგეგმარებისა და საქალაქო მეურნეობის კომისიის წევრებმა ანალოგიური შეხვედრები დასუფთავებისა და კეთილმოწყობის საქალაქო სამსახურებთან უკვე გამართეს და ასევე გაზისა და წყლის კომპანიების ანგარიშიც მოისმინეს.