"სამების მონასტერს ჩვენმა პატრიარქმა ქართველი ერის ავტოგრაფი უწოდა და მახათას მთაზე მშენებარე ივერიის ყოვლადწმიდა ღვთისმშობლის ხატის სახელობის ამ უზარმაზარ სამონასტრო კომპლექსსაც მალე დაერქმევა ისეთი სახელი, რომელიც სულ სხვა სულიერი სიმაღლიდან იქნება დანახული",- განაცხადა თბილისის საკრებულოს თავმჯდომარემ გიორგი ალიბეგაშვილმა, მახათას მთაზე მშენებარე ივერიის ყოვლადწმიდა ღვთისმშობლის ხატის სახელობის ტაძარში მიმდინარე საზეიმო წირვის შემდეგ.
როგორც გიორგი ალიბეგაშვილმა აღნიშნა, სამონასტრო კომპლექსი უნიკალურია იმით, რომ მას მთელი საზოგადოება, საქართველოში მცხოვრები ხალხი და ქართული ემიგრაცია ერთად აშენებს.
"ამ კომპლექსის მშენებლობაში არანაირი ორგანიზაცია და არცერთი სახელმწიფო სტრუქტურა არ არის ჩართული, მას აშენებენ უბრალო ადამიანები, რომლებიც შეძლებისდაგვარად თუნდაც ერთ ლარს რიცხავენ და მათ იციან, რომ თავიანთი ქველმოქმედებით სამშობლოსთვის ერთ სანთელს ანთებენ",- განაცხადა საკრებულოს თავმჯდომარემ და დასძინა, რომ ასეთი ქველმოქმედებით აგებული ტაძარი ხალხის ერთიანობისა და სიყვარულის სიმბოლოდ იქცევა. ივერიის ყოვლადწმიდა ღვთისმშობლის ხატის ასლის საქართველოში ჩამობრძანებიდან დღეს 25 წელი გავიდა. ამ ფაქტთან დაკავშირებით სრულიად საქართველოს კათოლიკოს-პატრიარქმა ილია მეორემ მახათას მთაზე მშენებარე ტაძარში საზეიმო წირვა-ლოცვა აღავლინა.
პარაკლისს საქართველოს პრემიერ-მინისტრი ირაკლი ღარიბაშვილი, მინისტრთა კაბინეტის წევრები, დედაქალაქის მერი დავით ნარმანია და დედაქალაქის მთავრობისა და საზოგადოების წარმომადგენლებიც დაეწრნენ.
