თბილისის მუნიციპალიტეტის საკრებულოს გარემოს დაცვის კომისიის წევრები „ეკო რეგულირების ასოციაციისა" და შპს „ქართული ტექნოლოგიების" წარმომადგენლების ახალ პროექტს გაეცნენ, რომელიც ატმოსფერული ჰაერის დაბინძურებისა და მისი შემცირების გზებს ეხებოდა. მოწვეული სტუმრების განცხადებით, ქართველ მეცნიერთა ჯგუფმა შექმნა მინარევი, რომელიც ირევა საწვავში და ავტომობილის გამონაბოლქვის მავნებლობის შემცირებას უწყობს ხელს. მათივე განმარტებით, აღნიშნული მინარევი ასევე იძლევა ეკონომიის საშუალებას და ორჯერ ამცირებს გამონაბოლქვის მავნებლობის დოზას.საკრებულოს წევრებმა დეტალურად მოისმინეს პროექტის შესახებ. სხდომა კითხვა პასუხის რეჟიმი გაიმართა. ფრაქცია „დემოკრატიული მოძრაობა-ერთიანი საქართველოს" წარმომადგენლის, შალვა ობგაიძეს თქმით, მიუღებელია ასეთი მნიშვნელობის პროექტის დამტკიცება მხოლოდ პრეზენტაციის დონეზე. მისივე თქმით, საჭიროა უფრო დეტალური ანალიზი და ლაბორატორიული კვლევის ჩატარება, რასაც კომისიის დანარჩენი წევრებიც დაეთანხმნენ. აქედან გამომდინარე, „ეკო რეგულირების ასოციაციის" წარმომადგენლები გაფართოებული ექსპერიმენტის ჩატარების ინიციატივით გამოვიდნენ. კომისიის წევრები ერთობლივი გადაწყვეტილების საფუძველზე შეთანხმდნენ, რომ აუცილებელია მსგავსი ექსპერიმენტის დეტალური კვლევის ჩატარება, რის შემდეგაც საკრებულო გაუწევს ორგანიზაციას რეკომენდაციას და პროცესში ჩაერთვება ყველა შესაბამისი სამსახური.