თბილისის მუნიციპალიტეტის საკრებულოს სპორტისა და ახალგაზრდულ საქმეთა კომისიის სხდომაზე დეპუტატებმა დღის წესრიგით გათვალისწინებული ოთხი საკითხი განიხილეს.
პირველი საკითხი კომისიის წევრებს ქ. თბილისის მუნიციპალიტეტის მერიის სოციალური მომსახურებისა და კულტურის საქალაქო სამსახურის წარმომადგენელი ზაზა ცინაძემ წარმოუდგინა.
მან დეპუტატებისგან ქ. თბილისის 2014 წლის ბიუჯეტით სპორტული და ახალგაზრდული ღონისძიებების პროგრამის ფარგლებში განსახორციელებელი პროექტის, კერძოდ, სამბოში თბილისის პირველობის გამართვისა და დაფინანსების თაობაზე მხარდაჭერა ითხოვა.
ზაზა ცინაძის განმარტებით, სამბოში თბილისის ჩემპიონატი ყოველწლიურად ტარდება და მისი ჩაშლის შემთხვევაში, სპორცმენები სამომავლოდ მონაწილეობას ვერც საქართველოს და ვერც ევროპის ჩემპიონატში ვერ მიიღებენ.
კომისიის თავმჯდომარემ ქეთევან ჯოხაძემ და კომისიის წევრებმა საკითხს მხარი ერთხმად დაუჭირეს.
ამავე სხდომაზე სახალხო დღესასწაულის "თბილისობა-2014''-ის ღონისძიების ფარგლებში ტრადიციული ნარდის ტურნირის ჩატარების თხოვნით დეპუტატებს ნარდის ასოციაციის პრეზიდენტმა თეიმურაზ ქურციკიძემ მიმართა, რაზეც თანხმობა მიიღო.
ამასთან კომისიის წევრმა ირაკლი ნადირაძემ საკუთარი მოსაზრება ერთ-ერთი პრიზის თაობაზე გამოთქვა და აღნიშნა, რომ კარგი იქნება, თუ გამარჯვებულს სხვა პრიზებთან ერთად თბილისის სიმბოლიკით გაფორმებულ ნარდს გადასცემენ.
თეიმურაზ ქურციკიძემ სხდომაზე კვიპროსის საერთაშორისო ნარდის ტურნირზე "თბილისი''-ს ნაკრები გუნდის გამგზავრებისა და შესაბამისად, დაფინანსების თაობზაც ისაუბრა.
კომისიის თავმჯდომარემ საკითხი განსახილველად მერიას გადასცა, რათა მოხდეს არსებული თანხების გადახედვა და შესაბამისად, საკრებულოში მისი პროგრამულად შემოსვლა.
"თანხის არსებობის შემთვევაში, კომისია საკითხის დადებითად გადაწყვეტას დაუჭერს მხარს'',-განაცხადა ქეთევან ჯოხაძემ.
საქართველოს მფრინავი დისკის ფედერაციის პრეზიდენტის პრეზენტაციამ დეპუტატების დიდი დაინტერესება გამოიწვია.
ალექსანდრე ედიშერაშვილმა კომისიის წევრებს თამაშის წესები გააცნო და აღნიშნული სპორტის სახეობის შესახებ ინფორმაცია დეტალურად წარმოუდგინა.
მისი განმარტებით, ამჟამად საქართველოს მასშტაბით 16 გუნდი ფუნქციონირებს და უახლოვეს მომავალში საკუთარი გუნდი გორის, ქუთაისის, გურჯაანისა და რუსთავის მოსახლეობასაც ეყოლება.
დეპუტატებმა წარმოდგენილი პროექტი ერთხმად მოიწონეს და დაფინანსებისთვის საჭირო ხარჯთაღრიცხვის მერიაში გადაგზავნას რეკომენდაცია გაუწიეს.
თავის მხრივ, ზაზა ცინაძე ალექსანდრე ედიშერაშვილს საკითხის დეტალურად შესწავლასა და შეძლებისდაგვარად დახმარების გაწევას დაჰპირდა.
მასალის გამოყენების პირობები