დღეს თბილისის მუნიციპალიტეტის საკრებულოს ვაკის მაჟორიტარი დეპუტატის, გიორგი მუსხელიშვილის ბიურო ოფიციალურად გაიხსნა. ბიუროს გახსნას ადგილობრივ მოსახლეობასთან ერთად ვაკის რაიონის გამგებელი, გივი ჭიჭინაძე და საქართველოს პარლამენტის ფრაქცია „ქართული ოცნება - თავისუფალი დემოკრატები"-ს თავმჯდომარე, ირაკლი ჩიქოვანი დაესწრნენ.
აღსანიშნავია, რომ გიორგი მუსხელიშვილი დღემდე მოქალაქეთა მიღებას თბილისის მუნიციპალიტეტის საკრებულოში ყოველ ორშაბათს მართავდა. დღეიდან კი დეპუტატი მოქალაქეთა მიღებას სხვა მაჟორიტარების მსგავსად ყოველ ოთხშაბათს საკუთარ ბიუროშიც ჩაატარებს.
გიორგი მუსხელიშვილის თქმით, ბიუროს ფუნქცია არის ის, რომ წინა ხელისუფლების უნიათობის გამო შეჭირვებულ ხალხს რაც შეიძლება მეტად დაეხმაროს. ბიურო ყოველდღიურად (შაბათ-კვირის გარდა) დილის ათიდან საღამოს ექვს საათამდე იმუშავებს, თავად მაჟორიტარ დეპუტატს კი მიღება ყოველ ოთხშაბათს ექნება.
„საკრებულოში, როგორც ფრაქციის თავმჯდომარე ხალხს ორშაბათობით ვღებულობ. დღეიდან კი ბიუროშიც ყოველ ოთხშაბათს ჩავატარებ მიღებას. ვთხოვ მოსახლეობას, მოგვაკითხონ, რათა მაქსიმალურად ვიყოთ დატვირთულები, რადგან მათი არჩევანია ის, რომ მე ვაკის მაჟორიტარი გავხდი. უნდა გავაკეთო ის, რაც მათ დავპირდი და თუშევძლებ კიდევ ამაზე უფრო მეტიც.
დღეს უკვე პირველი რამდენიმე მოქალაქე მივიღეთ ბიუროში. ვაკის რაიონის გამგებელიც აქ არის და მინდა იმ გუნდის ერთობა, რომელიც თბილისის მთავრობაში მოვიდა, მაქსიმალურად იგრძნოს ხალხმა", - აღნიშნავს გიორგი მუსხელიშვილი.
მისი თქმით, მოქალაქეებს ჯერ კიდევ არჩევნების წინ, საარჩევნო შტაბში ხვდებოდა, იმ დროიდან ჩანიშნული აქვს მოსახლეობის პრობლემები და მაქსიმალურად ცდილობს ხალხს მათ გადაწყვეტაში დაეხმაროს.
მაჟორიტარის ბიუროს გახსნის მნიშვნელობაზე ვაკის რაიონის გამგებელმაც ისაუბრა. გივი ჭიჭინაძის თქმით, ბიუროს გახსნა მოსასალმებელია, რადგანაც პრობლემები ძალიან ბევრია.
„პრობლემები ძალიან ბევრია და სწორედ ასეთი ოფისებიდან მოდის ინფორმაცია ჩვენთან. მართალია, ჩვენც გვაქვს თითქმის ყოველდღიური მიღებები და მოსახლეობისგან ინფორმაციას ამ გზითაც ვიღებთ, მაგრამ ყოველი დეპუტატი ვალდებულია, რომ თავისი ამომრჩევლისგან გაიგოს რა არის გასაკეთებელი და ინფორმაცია ჩვენამდე მოიტანოს. ჩვენ კი ვალდებულები ვართ შეძლებისდაგვარად მოვემსახუროთ ჩვენს ქალაქს და ამისათვის ყველაფერი გავაკეთოთ", - აღნიშნა გივიჭიჭინაძემ.
საპარლამენტო უმრავლესობის წევრის, ირაკლი ჩიქოვანის თქმით, მნიშვნელოვანია, რომ თბილისში აბსოლუტურად ყველა მოქალაქეს ექნება ადგილი, სადაც შეეძლება მიმართოს იმ ადამიანებს, ვინც თავად აირჩია და ვინც უნდა დაეხმაროს როგორც პრობლემების გადაწყვეტაში, ასევე ადგილობრივ მუნიციპალიტეტებთან ურთიერთობაში.
„იმედი მაქვს, რომ გიორგი მუსხელიშვილი, როგორც ვაკის რაიონის მაჟორიტარი, იქნება საკრებულოს ერთ-ერთი ყველაზე აქტიური წევრი და იგი დღესაც საკრებულოს ერთ-ერთი ყველაზე აქტიური წევრია. დარწმუნებული ვარ, გიორგი მუსხელიშვილი შეძლებს საკუთარი ამომრჩევლების ხმის გაჟღერებას როგორც საკრებულოში, ასევე მერიაში", - განაცხადა ირაკლი ჩიქოვანმა.
მასალის გამოყენების პირობები