10 ოქტომბერს 14:00 საათზე საქართველოს პარლამენტის ეროვნული ბიბლიოთეკის საგამოფენო დარბაზში ოლივერ უორდროპის 150 წლის იუბილესადმი მიძღვნილი გამოფენა გაიხსნება. გამოფენაზე წარმოდგენილი იქნება მარჯორი და ოლივერ უორდროპების საქართველოში მოღვაწეობის ამსახველი მასალები, რომელიც ეროვნული ბიბლიოთეკის ქართველოლოგიისა და იშვიათ გამოცემათა ფონდებში ინახება.
ინგლისელი დიპლომატი, მოგზაური და მთარგმნელი ოლივერ უორდროპი საქართველოში პირველად 1887 წელს ჩამოვიდა. მეორე ვიზიტისას მან უკვე იცოდა ქართული ენა და მჭიდრო კონტაქტები დაამყარა ქართველ მწერლებთან და საზოგადო მოღვაწეებთან ილია ჭავჭავაძესთან, აკაკი წერეთელთან, თედო სახოკიასთან, გრიგოლ ვოლსკისთან და სხვებთან. ოლივერ უორდროპმა შეისწავლა საქართველოს ისტორია და ლონდონში ინგლისურ ენაზე გამოსცა წიგნი "საქართველოს სამეფო". ეს გამოცემაც და მისი ქართული თარგმანიც ეროვნული ბიბლიოთეკის ქართველოლოგიის განყოფილებაში ინახება და ექსპოზიციაზე ორივე მათგანი იქნება წარმოდგენილი. ოლივერ უორდროპმა თარგმნა ასევე სულხან-საბა ორბელიანის "სიბრძნე სიცრუისა" და "ვისრამიანი". იგი ინგლისში გამოსცემდა ქართველოლოგიურ ჟურნალ "გეორგიკას".
1919-1921 წლებში საქართველოში იმყოფებოდა ინგლისური მისია. ოლივერ უორდროპი ინგლისის მთავრობამ საქართველოში ოფიციალურ წარმომადგენლად მოავლინა, რასაც საქართველოს მაშინდელი მთავრობა მიესალმებოდა. ოლივერ უორდროპი განსაკუთრებულად უჭერდა მხარს საქართველოს და დიდ დახმარებას უწევდა მაშინდელ ხელისუფლებას.
ოლივერ უორდროპის საქართველოთი ასეთი დაინტერესების შემდეგ მისი და მარჯორი უორდროპიც ეწვია საქართველოს. ისიც დაუახლოვდა მაშინდელ ქართველ საზოგადო მოღვაწეებს. მან თარგმნა შოთა რუსთაველის "ვეფხისტყაოსანი", ილია ჭავჭავაძის "განდეგილი", "ქართული ხალხური ზღაპრები" და "წმინდა ნინოს ცხოვრება". ყველა ეს გამოცემა ექსპოზიციაზე იქნება წარმოდგენილი.
ეროვნული ბიბლიოთეკის იშვიათ გამოცემათა ფონდში ინახება მარჯორი უორდროპის სამი და ოლივერ უორდროპის ერთი ხელნაწერი ქართულ ენაზე, რომლებიც ასევე გამოიფინება. ნოე რამიშვილის არქივში, რომელიც ეროვნული ბიბლიოთეკის იშვიათ გამოცემათა ფონდის ნაწილია, დაცულია საქართველოში მყოფი ინგლისური მისიის მიმოწერა ბრიტანეთის მთავრობასთან. მათ შორისაა ოლივერ უორდროპის რამდენიმე წერილი, რაც ასევე წარმოდგენილი იქნება გამოფენაზე. ლიტერატურასთან და ხელნაწერებთან ერთად გამოიფინება მარჯორი და ოლივერ უორდროპების შესახებ ზაქარია ჭიჭინაძის, თედო სახოკიას და სხვების მიერ გამოცემული ნაშრომები და ფოტომასალა.
14 ოქტომბერს უორდროპების მოღვაწეობისადმი მიძღვნილ გამოფენას საქართველოს თეტარის, მუსიკის, კინოსა და ქორეოგრაფიის მუზეუმი გამართავს.
25 ოქტომბერს 14:00 საათზე საქართველოს პარლამენტის შენობის მიმდებარე ტერიტორიაზე თბილისობისადმი მიძღვნილი ღონისძიებების ფარგლებში ოლივერ უორდროპის სახელობის სკვერი გაიხსნება.
