მეორე დღეა სასტუმრო „შერატონ მეტეხი პალასში", ინტელექტუალური საკუთრების მსოფლიო ორგანიზაციის (ისმო) და საქართველოს ინტელექტუალური საკუთრების ეროვნული ცენტრის „საქპატენტი" ორგანიზებით, საერთაშორისო კონფერენცია - „გეოგრაფიული აღნიშვნების დაცვა: იურიდიული ასპექტები და ბრენდინგის სტრატეგიები" მიმდინარეობს.
კონფერენციაზე მოხსენებით გამოვლენ ინტელექტუალური საკუთრების მსოფლიო ორგანიზაციის (ისმო), ამერიკის შეერთებული შტატების პატენტებისა და სასაქონლო ნიშნების ოფისის (USPTO), საფრანგეთის ადგილწარმოშობისა და ხარისხის ეროვნული ინსტიტუტის (INAO), იტალიის (გრანა პადანო), საფრანგეთის (კონიაკი) და საქართველოს (საქპატენტი, სტრატეგიული განვითარების სამმართველო, საქართველოს ღვინის ეროვნული სააგენტო) წარმომადგენლები, რომლებიც განიხილავენ ღვინის, მინერალური წყლის და სოფლის მეურნეობის სხვა პროდუქტების გეოგრაფიული აღნიშვნების დაცვასთან და გამოყენებასთან დაკავშირებულ მნიშვნელოვან საკითხებს. ქართველი და უცხოელი წამყვანი სპეციალისტები, გეოგრაფიული აღნიშვნების დაცვის საერთაშორისო, რეგიონალური და ნაციონალური სისტემების გათვალისწინებით, იმსჯელებენ გეოგრაფიული აღნიშვნების დაცვის შესაძლებლობებსა და კონტროლის მექანიზმებზე, კონფერენციის მონაწილეებს, ასევე გაუზიარებენ დაცვასთან დაკავშირებულ პრაქტიკულ გამოცდილებას, არსებულ პრობლემებსა და გამოწვევებს.
აღსანიშნავია, რომ გეოგრაფიული აღნიშვნები ბრენდინგის ერთ-ერთი ეფექტური სამართლებრივი ინსტრუმენტია, რომელიც მნიშვნელოვან როლს ასრულებს ქვეყნის საექსპორტო შესაძლებლობების გაზრდის, რეგიონალური განვითარებისა და ინვესტიციების მოზიდვის თვალსაზრისით. კონფერენცია ხელს შეუწყობს გეოგრაფიული აღნიშვნების დაცვის სისტემის შემდგომ განვითარებას საქართველოში, რაც განსაკუთრებით მნიშვნელოვანია ევროკავშირსა და საქართველოს შორის თავისუფალი ვაჭრობის პირობებში ქართული პროდუქციის წარმატებული ექსპორტისთვის ევროპის ბაზარზე. აღსანიშნავია, რომ გეოგრაფიული აღნიშვნების დაცვა ერთ-ერთი პრიორიტეტული საკითხია ევროკავშირთან ასოცირების შეთანხმების ფარგლებში.
კონფერენციის მუშაობაში მონაწილეობას მიიღებენ შვეიცარიის, ამერიკის, იტალიის, საფრანგეთის, მოლდოვას, უკრაინის, აზერბაიჯანის, ყაზახეთის ექსპერტები, საქართველოდან - სამთავრობო უწყებების, კერძო კომპანიების წარმომადგენლები, იურისტები და პატენტრწმუნებულები. სპეციალური მოწვევით კონფერენციას დაესწრებიან დიპლომატები ამერიკისა და იტალიის საელჩოებიდან.