ნანა იაშვილი: აკადემია ვალდებულია რომ იყოს თრენდული და ორიგინალური, იმიტომ რომ შემოქმედებითი სახელოვნებო უნივერსიტეტი თავისი პირადი იერსახის გარეშე ვერ იქნება კონკურენტუნარიანი.
14 ოქტომბერს თბილისის სახელმწიფო სამხატვრო აკადემია ახალ რექტორს აირჩევს. „ჯი-ეიჩ-ენს" რექტორობის ერთ-ერთი კანდიდატი ნანა იაშვილი ესაუბრა. ნანა იაშვილი - მედია ხელოვნების ფაკულტეტის დამაარსებელი, არქიტექტურის დოქტორი, თსსა პროფესორია.
- მოგვიყევთ იმ რეფორმებზე რასაც გაატარებთ არჩევის შემთხვევაში. დიდი ხანია სამხატვრო აკადემია რეალურ ცვლილებებს ელოდება.
"ნანა იაშვილი: ჩემი აზრით ბოლო ათი წლის მანძილზე ზოგადად საგანმანათლებლო რეფორმის დროს ერთ-ერთი ყველაზე საუკეთესო მიღწევა იყო ის, რომ ფაკულტეტებს დამოუკიდებელი ბიუჯეტით მართვის საშუალება მიეცათ და ამ საშუალებამ გაამართლა.
აუცილებელია გავითვალისწინოთ გარემო პირობები და ბაზრის მოთხოვნა. აუცილებელია გავიაზროთ, თუ როგორ შეიძლება მივაწოდოთ სტუდენტს ისეთი განათლება, რომელიც უახლოეს დროში მას შრომისუნარიანს, ნაყოფიერს გახდის, მოაგვარებს დასაქმების პრობლემას და ხელოვანს მოთხოვნადს გახდის არსებულ სიტუაციაში.
ვფიქრობ, რომ აკადემიამ სწორედ ინოვაციური ნაბიჯი გადადგა, როდესაც დამოუკიდებლობა მიანიჭა ფაკულტეტებს, თუმცა ყველა შემთხვევაში ამან შესაძლოა ვერ გაამართლოს, რადგან სამხატვრო აკადემია მრავალპროფილიანი ინსტიტუციაა განსხვავებული ფაკულტეტებით, განსხვავებული მიდგომებითა თუ ისტორიებით, ჩვენ უნდა შევინარჩუნოთ ყველა ის დარგი,რომელიც შესაძლოა დღეს პოპულარული არ არის, მაგრამ ტრადიციულია და განსაკუთრებით საჭიროებს გადარჩენას.
ვფიქრობ, რომ მედიახელოვნების ფაკულტეტის წარმატება სწორმა და კარგად გააზრებულმა მენეჯმენტმა განაპირობა.. სწორედ ეფექტური, თანამედროვე მენეჯმენტი, მეტი კოლაბირაცია, ინსტიტუციებთან კონტაქტი, სტანდარტებზე მუშაობა და ბაზრის კარგი ცოდნა არის აუცილებელი სამხატვრო აკადემიაში რეალური და ეფექტური ცვლილებების მისაღწევად.
- რა ცნებებზეა დაფუძნებული თქვენი ხედვით აკადემიის მართვის, მენეჯმენტის პრინციპები?
- ჩემი ხედვა ეფუძნება კომპრომისს და ბალანსს. გასათვალისწინებელია სტუდენთა და საზოგადოებრივი აზრი, ობიექტური თუ სუბიექტური პრობლემები და ამავე დროს ის რეფორმები, რომელიც მუდივად მიდის განათლების სისტემაში და სახელოვნებო საუნივერსიტეტო სწავლების პროცესში. უნდა გავაძლიეროთ სახელოვნებო სტანდარტებთან მიმართებაში კვლევა-ექსპერიმენტის შედეგად რეკომენდაციების შემუშავება... და რაც მთავარია, აკადემიურ და სტუდენტურ სეგმენტში გავაჩინოთ ეფექტური ურთიერთთანამშრომლობის მოტივაცია.
- რა გამოწვევების წინაშე დგას თბილისის სახელმწიფო სამხატვრო აკადემია?
აკადემიის გარშემო შეიქმნა ერთგვარი კავკასიური ცარცის წრე, ეს მიზეზები შესაძლოა გარკვეულწილად ობიექტურიც არის, მაგრამ ხშირად შესაძლოა პრობლემები საზოგადოების პროცესებთან არასწორი კომუნიკაციით იყოს განპირობებული..
ჩემი აზრით სამხატვრო აკადემიის წინაშე მდგარი გამოწვევები სწორედ გარდატეხის პროცესია. როგორც იცით ჩვენს საზოგადოებაში მენტალური გარდატეხა მოხდა.
გასული საუკუნის სამხატვრო აკადემია იყო უზარმაზარ ქვეყანაში, საბჭოთა კავშირში ინტეგრირებული მაღალი რეიტინგის უმაღლესი სასწავლებელი.
ეს ნიჭიერება და ისტორია არსად არ გამქრალა, მაგრამ სკოლა რომელიც ამ პერიოდმა დატოვა დღევანდელი დღისთვის მიუღებელია. აკადემიური სწავლების სკოლამაც გაიარა ევოლუცია 60-50-80-იან წლებში. იმ პერიოდში აკადემიას არაჩვეულებრივი შედეგები ჰქონდა და უმაღლესი სასწავლებელი ძალიან მოთხოვნად, საინტერესო ხელოვანებს უშვებდა.
დღევანდელ დღეს აუცილებელია სიახლის მიღება და რეფორმების გატარება. აკადემია ვალდებულია რომ იყოს თრენდული და ორიგინალური, იმიტომ რომ შემოქმედებითი სახელოვნებო უნივერსიტეტი თავისი პირადი იერსახის გარეშე ვერ იქნება კონკურენტუნარიანი.
- რამდენი კანდიდატი იყრის კენჭს რექტორის თანამდებობაზე და რა უპირატესობა გაქვთ?
- რექტორის პოზიციაზე ორი კანდიდატი ვიყრით კენჭს. ძალიან ვაფასებ ჩემს კონკურენტს გიორგი გუგუშვილს. ამით შემოვიფარგლები და მხოლოდ ჩემს პოზიციაზე ვისაუბრებ .
ბოლო ათი წლის მანძილზე განვიცადე ექსპერიმენტი. ვარ მედია ხელოვნების ფაკულტეტის ერთ-ერთი დამფუძნებელი. როგორც იცით მსგავსი ფაკულტეტი აკადემიის სივრცეში არასდროს არ ყოფილა.
დღეს ეს ახალი ფაკულტეტი საკმაოდ რეიტინგულია, რაც მაძლევს საფუძველს დარწმუნებული ვიყო ჩემს ძალებში, როგორც მენეჯერი, როგორც სიახლის მოყვარული და ნოვაციის შემომტანი სასწავლო პროცესში.
მე ვარ ძალიან მშრომელი და თავდადებული ადამიანი. რექტორად არჩევის შემთხვევაში სრულიად გამოვიყენებ პირად რესურსს რათა უმოკლეს დროში, სამხატვრო აკადემია რეიტინგულ უნივერსიტეტად ჩამოყალიბდეს.
ჩვენ უნდა გავერთიანდეთ ერთი იდეის გარშემო და გუნდურად მიღვაწოთ წარმატებას. ვიყოთ უფრო მეტად გამსჭვალული სიყვარულითა და საქმისადმი ერთგულებით.