თბილისის მუნიციპალიტეტის საკრებულოში განათლებისა და კულტურის კომისიის სხდომა გაიმართა, რომელშიც კომისიის მოწვევით მუნიციპალურ დაქვემდებარებაში არსებული მუზეუმების ხელმძღვანელებმა და მერიის სოციალური მომსახურებისა და კულტურის საქალაქო სამსახურის წარმომადგენლებმა მიიღეს მონაწილეობა. სხდომაზე მუზეუმების წინაშე მდგარი პრობლემები განიხილეს და მათი გადაჭრის გზებზე იმსჯელეს.
საკრებულოს მუნიციპალიტეტის განათლებისა და კულტურის კომისიის თავმჯდომარის, თამარ ტალიაშვილის ინიციატივით, დეტალურად იქნა განხილული მუზეუმების შენობების საკუთრების საკითხი. კერძოდ, ქ. თბილისის მუნიციპალურ დაქვემდებარებაში არსებული მუზეუმების შენობები ეკონომიკის სამინისტროს ბალანსზე იმყოფება და მერიას სარემონტო სამუშაოების ჩატარების სამართლებრივი უფლება არ გააჩნია, რაც პრობლემას უქმნის მუზეუმების ფუნქციონირებას და საფრთხეში აგდებს მუზეუმებში დაცულ ექსპონატებს.
თბილისის საკრებულოს მუნიციპალიტეტის განათლებისა და კულტურის კომისიის თავმჯდომარის, თამარ ტალიაშვილის განცხადებით, დღეს დღის წესრიგში დგას იმ პრობლემების შესწავლა და გადაჭრის გზების ძიება, რომლებიც მუზეუმების წინაშედგას.
„ერთ-ერთი ძალიან მტკივნეული საკითხი არის თოჯინების მუზეუმთან დაკავშირებული პრობლემა. ორი წლის წინ აღნიშნული მუზეუმის შენობა გასხვისდა და სანაცვლოდ მუზეუმისთვის ალტერნატიული ფართი არ იქნა შეთავაზებული. სწორედ ამის გამო მუზეუმი დღესაც არ არის ექსპლოატაციაში შესული, ანუ ამ ვანდალური ქმედებიდან გამომდინარე ქართული საზოგადოება თოჯინების მუზეუმს არის მოკლებული.
რაც შეეხება დანარჩენ საკითხებს, ერთ-ერთი უმნიშვნელოვანესი არის ექსპონატების შენახვასთან დაკავშირებული პრობლემა, რადგან არც ერთ მუზეუმს არ გააჩნია შესაბამისი პირობები საიმისოდ, რომ ეს ექსპონატები სათანადო პირობებში იქნეს დაცული. ამ დროს კი მოგეხსენებათ, მუზეუმის ყველაზე დიდი სიმდიდრე არის ექსპონატების სიმრავლე.
ასევე მნიშვნელოვანი პრობლემაა, რომ მუზეუმი ქალაქის კულტურული ცხოვრების მნიშვნელოვანი შემადგენელი კომპონენტი იყოს. შეუძლებელია მუზეუმი განვიხილოთ დამოუკიდებლად, იქნება ეს სახელოვნებო სასწავლებლები, რაიმე სახის კულტურული ღონისძიებებთან მიმართებაში და ა.შ. ამიტომ მუზეუმების ამ საერთო კულტურულ ცხოვრებაში ჩართვა აუცილებელია", - განცხადა თამარ ტალიაშვილმა.
რაც შეეხება მუზეუმების შენობების საკუთრების საკითხს, კომისიის თავმჯდომარის თქმით, გაკეთდება მიმართვა ეკონომიკის სამინისტროსადმი, რათა აღნიშნული მუზეუმები მუნიციპალურ დაქვემდებარებაში გადმოვიდეს.
თოჯინების მუზეუმის დირექტორი, ნანა ოქრუაშვილი კი აღნიშნავს, რომ თბილისის მუნიციპალიტეტის საკრებულოში გამართული შეხვედრა ძალიან მნიშვნელოვანია, რადგან ძალიან ბევრ მუზეუმს აქვს სხვადასხვა პრობლემები. ნანა ოქრუაშვილის თქმით, თოჯინების მუზეუმის ერთ-ერთი მტკივნეული საკითხი არის ის, რომ უკვე დიდი ხანია მიმდინარეობს შენობის რემონტი, თუმცა დღევანდელი შეხვედრა იძლევა იმის წინაპირობას, რომ მუზეუმის წინაშე მდგარი პრობლემები აღმოიფხვრას.
„ვინაიდან დღეს თბილისის მუნიციპალიტეტის საკრებულოში მიმდინარე შეხვედრა ძალიან საქმიანია და აქ ყველა პრობლემაზე ვიმსჯელეთ, იმედი მაქვს, რომ ყველა პრობლემები გადაიჭრება", - განაცხადა ნანა ოქრუაშვილმა.