თბილისის მუნიციპალიტეტის საკრებულოში ურბანული დაგეგმარებისა და საქალქო მეურნეობის კომისიის სხდომა გაიმართა.
სხდომაზე დეპუტატებმა თბილისის განვითარების ფონდის ხელმძღვანელის, თემურ ხომერიკის ანგარიში მოისმინეს. როგორც ხომერიკმა განაცხადა, აღნიშნულ ფონდს წინა ხელისუფლებიდან განულებული ბიუჯეტი დახვდა და მაგალითისთვის საბანკო ანგარიშებიდან ნაღდი ფულის სახით თანხების გატანა და არამიზნობრივი ხარჯვა მოიყვანა. ფონდის ხელმძღვანელის თქმით, თბილისის მერიიდან ლიბერთი ბანკის ანგარიშზე ხორციელდებოდა თანხების ჩარიცხვა, თუმცა მიმდინარე პროექტებზე ხარჯვა არ მომხმდარა. მისივე თქმით, ფონდის საბანკო ანგარიშებზე ნაწარმოებია დიდი ოდენობით ნაღდი ანგარიშსწორებები, საიდანაც ფონდის ყოფილი ხელმძღვანელის გიორგი საბანაძის მხრიდან სოლიდური თანხის გატანა ხდებოდა.
თემურ ხომერიკმა ფონდის მომსახურე პერსონალზეც ისაუბრა და აღნიშნა, რომ მას შრომითი რესურსების კუთხით სავალალო მდგომარეობა დახვდა. თბილისის განვითარების ფონდის უფროსმა ხაზი გაუსვა როგორც მიმდინარე, ასევე დასრულებულ, დარღვევით განხორციელებულ მშენებლობებს. „ ფონდი ინფორმაციულ ვაკუუმშია, რადგან მის საკუთრებაში წარმოდგენილია არსებული ობიექტების არასრული ნუსხა, ასევე არასრულყოფილია საპროექტო დოკუმენტაცია, დარღვეული საკუთრების უფლებები და წითელი," -განმარტა თბილისის განვითარების ფონდის ხელმძღვანელმა.
პრეზენტაციის დასრულების შემდეგ სხდომა კითხვა - პასუხის რეჟიმში წარიმართა. დეპუტატები ძირითადად ისტორიული უბნებით დაინტერესდნენ.
საკრებულოს ქონების მართვის და საფინანსო- საბიუჯტო კომისიის თავმჯდომარემ, ჯაბა სამუშიამ ფონდის ხელმძღვანელსა და დეპუტატებს თბილისის არქეოლოგიური ექპედიციის სამსახურის შექმნა შესთავაზა: „ იმისათვის, რომ ამა თუ იმ უბანში წარმოებული გათხრებისას შენარჩუნდეს ისტორიული კულტურა დედაქალაქი ნახევარ მილიონს მაინც უნდა ხარჯავდეს".
კრწანისის მაჟორიტარმა დეპუტატმა ბექა ნაცვლიშვილმა კი , თემურ ხომერიკს პირველ რიგში მოსახლეობის პრობლემების გათვალისწინება მოსთხოვა. მანვე დასძინა, რომ აუცილებელია ფონდმა ყველა უბანზე ჩაშლილი ინფორმაცია წარმოადგინოს, რის შემდეგაც მოხდება დეტალური შესწავლა და თანხის ბიუჯეტში გათვალისწინება საჭიროების შემთხვევაში განხორციელდება.
საკრებულოს სარევიზიო კომისიის თავმჯდომარემ ნუგზარ მალაღურაძემ ძველ უბნებში სანიაღვრე სისტემის მოწესრიგება მოითხოვა. მისი თქმით, სამუშაოები ისე უნდა გადანაწილდეს, რომ არ დაზიანდეს სხვა სახლები, რაც ბიუჯეტიდან კიდევ უფრო მეტი თანხის გადინებას მოახდენს.
„ გადასახედია შენობები, რომლებსაც ისტურიული სტატუსი აქვთ მინიჭებული, რადგან არსებობს ნაგებობები, რომლებსაც ათეულობით წლის წინ ახალი ტექნოლოგიებით გაუკეთდათ რეკონსტრუქცია და ის უკვე აღარ ატარებს ისტორიულ სტატუსს,"-განაცხადა ნუგზარ მალაღურაძემ .
