9 ოქტომბერს თბილისში საერთაშორისო საარბიტრაჟო კონფერენცია გაიმართება. კონფერენციაში მონაწილეობას მიიღებს საქართველოს იუსტიციის მინისტრი თეა წულუკიანი. ღონისძიებაზე მოწვეულნი იქნებიან არბიტრაჟის პრაქტიკოსები ლონდონიდან, პარიზიდან, სტამბულიდან, ვილნიუსიდან. კონფერენციის მხარდამჭერი არიან წამყვანი საერთაშორისო და რეგიონული იურიდიული კომპანიები.
იუსტიციის სამინისტროს ინფორმაციით, კონფერენციის მონაწილეებს სიტყვით იუსტიციის მინისტრიც მიმართავს და არბიტრაჟის ინსტიტუტის, როგორც დავების გადაწყვეტის ალტერნატიული მექანიზმის, მნიშვნელობის შესახებ ისაუბრებს.
9 ოქტომბერს დაგეგმილი კონფერენცია იქნება საარბიტრაჟო საქმისადმი მიძღვნილი პირველი და ყველაზე მსხვილი ღონისძიება საქართველოსა და რეგიონში. ღონისძიებაზე განიხილება თანამედროვე საერთაშორისო არბიტრაჟის მიღწევები და გამოწვევები, ასევე, არბიტრაჟთან დაკავშირებული სხვა საკითხები.
საქართველოში არბიტრაჟის ინსტიტუტის განვითარება რამდენიმე კუთხითაა მნიშვნელოვანი: პირველ რიგში, ბიზნესმენები არ იქნებიან იძულებული, ყველა დავის შემთხვევაში, სასამართლოს მიმართონ, იარსებებს დავების გადაწყვეტის ალტერნატიული და სანდო მექანიზმი. ამისათვის კი საარბიტრაჟო დავების მექანიზმი მოქნილი და ბიზნესის ინტერესებზე მორგებული უნდა იყოს და ის მაქსიმალურად უახლოვდებოდეს გაერო-ს არბიტრაჟის წესებს.
საქართველოში არბიტრაჟის ინსტიტუტისადმი კეთილგანწყობილი გარემოს შესაქმნელად იუსტიციის სამინისტრომ „არბიტრაჟების შესახებ" კანონში ცვლილებათა პაკეტი მიმდინარე წლის ზაფხულში წარადგინა.