4-5 ოქტომბერს, ქ. კიევის ცენტრში, ანდრეევსკის დაღმართზე „თბილისობის" დღესასწაულთან დაკავშირებული ღონისძიებები გაიმართა, რომლის გახსნაზე დამსწრეთ სიტყვით მიმართა საქართველოს ელჩმა მიხეილ უკლებამ.
საკონცერტო პროგრამაში მონაწილეობა მიიღო უკრაინის ქართველთა ასოციაციის „იბერიელი" და კულტურულ-საგანმანათლებლო ცენტრის „იბერია" შემოქმედებითმა კოლექტივებმა. დამსწრეთათვის მოეწყო სხვადასხვა კონკურსი და ვიქტორინა.
ღონისძიების ფარგლებში, ანდრეევსკის დაღმართზე მდებარე „ივანე კავალერიძის მუზეუმში" მოეწყო ქართველი მწერლების დათო ტურაშვილის, აკა მორჩილაძისა და ბასა ჯანიკაშვილის უკრაინულ ენაზე ნათარგმნი ნაწარმოებების პრეზენტაცია, ხოლო რესტორანში „კანაპე", ცნობილმა ქართველმა მზარეულებმა უკრაინელი ჟურნალისტებისთვის გამართეს ქართული სამზარეულოს მასტერკლასი. ასევე შედგა გამოფენის „ფარაჯანოვი, 21-ე საუკუნის სიზმრები" პერფორმანსი-პრეზენტაცია.
მიმდებარე ტერიტორიაზე ფართოდ იყო წარმოდგენილი უკრაინაში მოქმედი ქართული რესტორნების კულინარული პროდუქცია და ქართული სასმელები, რომელთაც დიდი მოწონება დაიმსახურეს.
აღსანიშნავია, რომ ღონისძიება ფართოდ გაშუქდა უკრაინული ტელეარხებისა და მასმედიის სხვა საშუალებების მიერ.
ორი დღის განმავლობაში „თბილისობის" დღესასწაულთან დაკავშირებულ ღონისძიებებს 10 ათასზე მეტი კიეველი და ქალაქის სტუმარი დაესწრო.
მასალის გამოყენების პირობები
