სარიტუალო მომსახურების კომპანია „ჰერმესის" ხელმძღვანელობამ დღეს თბილისის მთავრობას გაწეული სამუშაოების შესახებ ანგარიში წარუდგინა და სამომავლო გეგმები გააცნო.
„ჰერმესის" დირექტორის მიხეილ ძაგანიას თქმით, დღეისთვის კომპანიის მმართველობაში 31 საქალაქო სასაფლაოა, მთაწმინდისა და დიდუბის პანთეონების გარდა, რომელიც მერიის დაქვემდებარებაშია. გარდა ამისა, მისივე თქმით, 20-მდე სასაფლაო ფუნქციონირებს დედაქალაქზე შემოერთებულ დიდი და პატარა ლილოს, ფონიჭალის, ზაჰესის, შავი უბნის, სოფელ დიღმის, ტაბახმელას, კოჯრის და სხვა ტერიტორიებზე, რომელიც ასევე არ შედის „ჰერმესის" დაქვემდებარებაში.
როგორც მიხეილ ძაგანია აცხადებს, კომპანიის მმართველობაში არსებული სასაფლაოებიდან დაახლოებით ნახევარი დახურულია, ანუ, არ გაიცემა ახალი საფლავები, თუმცა ძველ საგვარეულო სამარხში დაკრძალვა შესაძლებელია. მისივე თქმით, ადგილების პრობლემაა ცენტრალურ უბნებში მდებარე სასაფლაოებზე.
გადასაჭრელ საკითხებს შორის მიხეილ ძაგანია ძირითადად ინფრასტრუქტურული ხასიათის და სამართლებრივი რეგულაციების კუთხით არსებულ პრობლემებს ასახელებს. კერძოდ, მისი თქმით, მოსაწყობია სასაფლაოებთან მისასვლელი გზები საერთო სიგრძით 24 კილომეტრი, გადასაჭრელია დასუფთავების და ადმინისტრაციული შენობების კეთლიმოწყობის, წყლის სისტემების გამართვის საკითხები და სხვა. გარდა ამისა, აუცილებელია ჭირისუფლისთვის რეგულაციების გამარტივება, რათა მათ იოლად შეძლონ დაკრძალვისთვის აუცილებელი დუკუმენტაციის მიღება და მიცვალებულის დროულად დასაფლავება. სამომავლოდ, ძაგანიას თქმით, არსებობს სარიტუალო სახლის მშენებლობის იდეა.
დავით ნარმანიას თქმით, სარიტუალო მომსახურებასთან დაკავშირებით მოსახლეობას პრეტენზიები აქვს. მისივე თქმით, სასაფლაოებამდე მისასვლელი გზები სასურველია აღდგომის დღესასწაულამდე კეთილმოეწყოს. დავით ნარმანიამ იმედი გამოთქვა, რომ კომპანიის ახალი მენეჯმენტი არსებულ ხარვეზებს გამოასწორებს, რის შემდეგაც თბილისელებისთვის სარიტუალო მომსახურებასთან დაკავშირებული პროცედურები უფრო ხელმისაწვდომი იქნება.