საქართველოს პრემიერ-მინისტრმა ირაკლი ღარიბაშვილმა საქართველოში მცხოვრებ მუსლიმანებს ყურბან-ბაირამის დღესასწაული მიულოცა.
მთავრობის მეთაური დღეს თბილისის მეჩეთში იმყოფებოდა. ირაკლი ღარიბაშვილმა მეჩეთში შეკრებილ მუსლიმანებს სიტყვით მიმართა და განაცხადა, რომ მუსლიმებისა და მართლმადიდებლების თანაცხოვრება საქართველოში საუკუნეებს ითვლის.
"ეს არის სიკეთის ბოროტებაზე გამარჯვების, სიყვარულის, იმედის, ქველმოქმედების დიდი დღესასწაული და სიამოვნებით ვუერთდები თქვენს სიხარულს. ჩვენ ყოველთვის ვამაყობდით ჩვენი ტოლერანტობით. ჩვენი მრავალკულტურული ურთიერთობები და თანაცხოვრება უნიკალური და უპრეცენდენტო. ის ხელოვნურად დადგმული პროვოკაციები, რომელსაც ადგილი ჰქონდა ბოლო წლების განმავლობაში, რა თქმა უნდა, გავლენას ვერ მოახდენს ჩვენს ურთიერთობებზე. სახელმწიფო ყოველთვის იქნება უკომპრომისო ასეთ პროვოკაციებთან დაკავშირებით. არავის მივცემთ ჩვენს მოქალაქეებს შორის შუღლის გაღვივების უფლებას, მით უმეტეს, რელიგიურ ნიადაგზე", - განაცხადა პრემიერ-მინისტრმა.
მთავრობის მეთაურმა ხაზგასმით აღნიშნა, რომ სახელმწიფო დგას ყველა რელიგური აღმსარებლობის მოქალაქეების გვერდით და ასე იქნება მომავალშიც.
მასალის გამოყენების პირობები