საგარეო საქმეთა სამინისტროში გაიმართა საგარეო საქმეთა მინისტრის პირველი მოადგილის, დავით ზალკალიანის შეხვედრა ევროკავშირის მონიტორინგის მისიის (EUMM) ხელმძღვანელთან, ტოივო კლაართან.
საუბარი შეეხო ევროკავშირის მონიტორინგის მისიის საქართველოში საქმიანობისა და ჟენევის საერთაშორისო მოლაპარაკებების ფარგლებში მიმდინარე საკითხებს, ასევე საქართველოს ოკუპირებულ ტერიტორიებზე არსებულ ვითარებას. უპირველეს ყოვლისა, ქართული მხარის მიერ გამოითქვა შეშფოთება საოკუპაციო რეჟიმების მიერ ადგილობრივი მოსახლეობისათვის გადაადგილების თავისუფლების შეზღუდვისა და დამატებითი ხელოვნური ბარიერების შექმნის თაობაზე.
ამასთან, საგარეო საქმეთა მინისტრის პირველმა მოადგილემ კვლავ ხაზი გაუსვა ევროკავშირის მონიტორინგის მისიის, როგორც საქართველოს ტერიტორიაზე მოქმედი ერთადერთი საერთაშორისო მექანიზმის დიდ მნიშვნელობას, და მისიის ხელმძღვანელს მიაწოდა ქართული მხარის მოსაზრებები მისიის ეფექტურობის ამაღლებასა და ნდობის განმტკიცების პროცესთან დაკავშირებით.