საჯარო რეესტრი აგრძელებს „საკონსულტაციო ბარათების" გამოქვეყნებას. დღევანდელი საკონსულტაციო ბარათის თემაა:"საკადასტრო გეგმა"
რა არის საკადასტრო გეგმა
საკადასტრო გეგმა არის მიწის ნაკვეთის საკადასტრო და გრაფიკული მონაცემების ამსახველი დოკუმენტი, რომელიც შეიცავს ინფორმაციას მიწის ნაკვეთის საკადასტრო კოდის, მისი ფართობის, (ხაზობრივი ნაგებობის შემთხვევაში სიგრძის), კონფიგურაციის, დანიშნულების, საკოორდინატო ბადის, მიწის ნაკვეთზე განთავსებული შენობა-ნაგებობებისა (მათ შორის მშენებარე) და მათი სართულიანობის, ასევე ინფორმაციას ამ მიწის ნაკვეთზე იმ უფლებებისა და შეზღუდვების შესახებ, რომელთა საკადასტრო მონაცემებიც რეგისტრირებულია საჯარო რეესტრში.
საკადასტრო გეგმა გაიცემა საჯარო რეესტრის მონაცემთა ბანკის საფუძველზე და ასახავს მისი მომზადების მომენტისათვის მიწის ნაკვეთის და შენობა-ნაგებობების შესახებ ძალაში მყოფ მონაცემებს.
საკადასტრო გეგმის მომზადების/გაცემის წესი და პირობები
საკადასტრო გეგმა მზადდება სარეგისტრაციოდ წარმოდგენილი მიწის ნაკვეთის საკადასტრო აზომვითი ნახაზის საფუძველზე იმ შემთხვევაში, თუ არ იკვეთება სარეგისტრაციო წარმოების შეჩერების ან უარის თქმის საფუძვლები.
საკადასტრო მონაცემების დამუშავება ხორციელდება სახელმწიფო გეოდეზიურ კოორდინატთა სისტემაში, კერძოდ, WGS 84 კოორდინატთა სისტემასა და UTM პროექციაში
უძრავ ნივთებზე უფლებათა რეესტრში საკუთრების უფლებადაურეგისტრირებელ უძრავ ნივთზე საკუთრების უფლების, ასევე საკადასტრო მონაცემების ცვლილების რეგისტრაციისას - საკადასტრო გეგმა გაიცემა ამონაწერთან ერთად. ასეთ შემთხვევაში ცალკე საკადასტრო გეგმის მომზადებისთვის დადგენილი მომსახურების საფასური არ გადაიხდევინება და დაინტერესებული პირი იხდის მხოლოდ უფლების რეგისტრაციისათვის დადგენილ მომსახურების საფასურს: 4 სამუშაო დღე - 50 ლარი, 1 სამუშაო დღე - 150 ლარი, ხოლო განცხადების შეტანის დღეს - 200 ლარი.
რეგისტრირებულ უძრავ ნივთზე საკადასტრო გეგმის მომზადებისათვის მომსახურების საფასური შეადგენს 1 სამუშაო ვადაში 5 ლარს.
შესაძლებელია, ასევე დაჩქარებული მომსახურების განხორციელებაც. ამ შემთხვევაში საკადასტრო გეგმის მომზადებისათვის განცხადების შეტანის დღეს მომსახურების საფასური შეადგენს 20 ლარი.
სახელმწიფოს, თვითმმართველი ერთეულის ან საქართველოს ეროვნული ბანკის საკუთრებაში არსებულ ნივთზე საკადასტრო გეგმის მომზადება საფასურის გადახდისაგან გათავისუფლებულია.
დამატებითი ინფორმაცია:
საკადასტრო გეგმა არ მზადდება თუ მიწის ნაკვეთის საკადასტრო მონაცემები დაუზუსტებელია.
რეგისტრაციის მიზნებისთვის უძრავი ნივთის დაზუსტებული საკადასტრო მონაცემები ნიშნავს "საჯარო რეესტრის შესახებ" ინსტრუქციისა და საქართველოს მოქმედი კანონმდებლობის შესაბამისად შედგენილ საჯარო რეესტრში დაცულ საკადასტრო ინფორმაციას. სხვა შემთხვევაში უძრავი ნივთის საკადასტრო მონაცემები მიიჩნევა დაუზუსტებლად.
