პარლამენტის თავმჯდომარე დავით უსუფაშვილი ევროსაბჭოს მიერ საქართველოს შესახებ მიღებული რეზოლუციის შეფასებისას აცხადებს, რომ ყველა კითხვასა და წუხილს რომელიც რეზოლუციაშია გამოთქმული დამაჯერებელი პასუხი გაეცემა.
,,დარწმუნებული ვარ, ყველა იმ კითხვასა და წუხილზე რომელიც რეზოლუციაშია გამოთქმული დამაჯერებელი პასუხი იქნება გაცემული. დამაჯერებელი პასუხი ჩვენი ევროპელი მეგობრებისთვის და არა მათთვის ვინც ცდილობს ამ რეზოლუციას ამოეფაროს და რაიმეთი წარსულში საკუთარი ბოროტმოქმედება თუ შეცდომები გაამართლოს", _აცხადებს უსუფაშვილი ჟურნალისტებთან საუბრისას.
მისივე განცხადებით, რეზოლუცია ხელისუფლებას მოუწოდებს იმუშაოს უკეთ და არ ლაპარაკობს იმაზე, რომ წინა ხელისუფლება იყო კარგი, ყველაფერი კარგად გააკეთეს და ყველა ბრალი ჩამოერეცხათ.
შეგახსენებთ, რომ 103 მომხრე, 27 წინააღმდეგი - ევროსაბჭომ საქართველოს შესახებ რეზოლუცია მიიღო. მასში დარჩა ჩანაწერი, რომელიც ყოფილ მაღალჩინოსნებს, მათ შორის ბაჩო ახალაიას პატიმრობის ვადას და მისთვის წინასწარი პატიმრობის შეცვლას, ასევე მიხეილ სააკაშვილისა და მისი ოჯახის წევრების ქონების დაყადაღებას ეხება.
