გლობალური ჯანდაცვის უსაფრთხოების პროგრამის მიხედვით, საქართველო ერთ-ერთი ლიდერი ქვეყანაა, რომელიც მნიშვნელოვან როლს ასრულებს დაავადებათა აღმოჩენისა და გამოვლენის მიმართულებით,- ამის შესახებ საქართველოს პრემიერ-მინისტრმა ირაკლი ღარიბაშვილმა რიჩარდ ლუგარის საზოგადოებრივი ჯანმრთელობის კვლევით ცენტრში სიტყვით გამოსვლისას განაცხადა.
პრემიერი ლუგარის ცენტრში დღეს აშშ-ის ელჩ რიჩარდ ნორლანდთან ერთად იმყოფებოდა. ცენტრის საქმიანობის შესახებ ინფორმაცია ირაკლი ღარიბაშვილს ჯანდაცვის მინისტრმა დავით სერგეენკომ და დაავადებათა კონტროლის ეროვნული ცენტრის ხელმძღვანელმა ამირან გამყრელიძემ მიაწოდეს.
პრემიერმა ხაზგასმით აღნიშნა ლაბორატორიის რეგიონალური მნიშვნელობა და განაცხადა, რომ ეს პროექტი არის ამერიკის მთავრობის უდიდესი ინვესტიცია საქართველოში.
„2013 წელს ლაბორატორია სამართავად გადმოეცა საქართველოს მთავრობას და შარშანვე მიაღწია სრული ოპერირების ფაზას. ამან საშუალება მოგვცა, არა მხოლოდ წარმატებულად ჩავრთულიყავით ეპიდემიების ზედამხედველობის საქმეში, არამედ, იმის შესაძლებლობაც გაჩნდა, რომ ლუგარის ცენტრი გადაქცეულიყო რეგიონალური მნიშვნელობის სამეცნიერო-კვლევით ცენტრად", - განაცხადა პრემიერ-მინისტრმა.
საქართველოს მთავრობის მეთაურმა განსაკუთრებულად გამოყო ამერიკის მთავრობის დიდი ღვაწლი და მადლობა გადაუხადა ყველას, ვინც მონაწილეობა მიიღო ცენტრის ჩამოყალიბებაში.
მასალის გამოყენების პირობები
