დღეს, 30 სექტემბერს საქართველოს ეწვევა გაეროს განვითარების პროგრამის (UNDP) ადმინისტრატორი - ჰელენ კლარკი. მოკლე ვიზიტი გაიმართება სამხრეთ კავკასიის ქვეყნებში მისი ოფიციალური ტურის ფარგლებში.
ხვალ, ოთხშაბათს, 1-ელ ოქტომბერს, გაეროს დელეგაცია შეხვდება საქართველოს პრემიერ მინისტრს - ირაკლი ღარიბაშვილს, საქართველოს პრეზიდენტს - გიორგი მარგველაშვილს და საქართველოს საგარეო საქმეთა მინისტრს - მაია ფანჯიკიძეს.
ქვეყნის ლიდერებთან შეხვედრისას ჰელენ კლარკი ისაუბრებს საქართველოს განვითარების მიღწევებსა და გამოწვევებზე და გაეროს განვითარების პროგრამის როლზე ქვეყნის დემოკრატიული გარდაქმნების ხელშეწყობის საქმეში.
გაეროს განვითარების პროგრამის დელეგაციაში ასევე შედიან UNDP-ის რეგიონული ბიუროს ხელმძღვანელი - ჯიჰან სულთანოღლუ, და UNDP-ის მუდმივი წარმომადგენელი საქართველოში - ნილს სკოტი.
ჰელენ კლარკის პირველი ვიზიტი საქართველოში გაიმართა 2013 წლის თებერვალში. მაშინ მან გაეროს განვითარების პროგრამის სახელით დაადასტურა საქართველოში მიმდინარე რეფორმების მხარდაჭერა ისეთ სფეროებში, როგორიცაა მართლმსაჯულება, ადამიანის უფლებები, ეკონომიკური განვითარება და გარემოს დაცვა.
ჰელენ კლარკი გაერთიანებული ერების ორგანიზაციის ერთ-ერთი უმაღლესი ოფიციალური პირია. 2009 წლიდან იგი სათავეში ჩაუდგა გაეროს განვითარების პროგრამას, ხოლო მანამდე იყო ახალი ზელანდიის პრემიერ მინისტრი სამი წარმატებული ვადის მანძილზე.