დღეს, ქალაქ კიშინოვში, ევროპის კარტოგრაფიის, მიწის რეგისტრაციისა და კადასტრის ეროვნული სააგენტოების ასოციაცია „Euro Geographics"-ის გენერალური ასამბლეა გაიხსნა. პარალელურად, გაეროს გეო-სივრცითი ინფორმაციის მართვის ექსპერტთა ევროპის კომიტეტის პირველი პლენარული სხდომა იმართება.
ღონისძიებას საჯარო რეესტრის ეროვნული სააგენტოს წარმომადგენლები მონაწილეობენ. პლენარული სხდომის ფარგლებში ყველა თემატური საკითხის დამტკიცება და კენჭისყრა მოხდება.
შეგახსენებთ, 2010 წლის 1 ივნისიდან საჯარო რეესტრის ეროვნული სააგენტო ევროპის კარტოგრაფიის, მიწის რეგისტრაციისა და კადასტრის ეროვნული სააგენტოების ასოციაციის წევრია და მის პროექტებში აქტიურადაა ჩართული.
EuroGeorgaphics-თან საქართველოს თანამშრომლობა განსაკუთრებით მნიშვნელოვანია გეოინფორმაციულ სფეროში ევროპული სტანდარტების დამკვიდრების, სააგენტოს საკადრო რესურსის განვითარების, გეოგრაფიულ მონაცემებთან მუშაობის პრაქტიკის გაზიარების, ასევე, რეგიონალური და ევროპული სივრცითი მონაცემების გლობალურ სფეროში ეროვნული ინტერესების წარდგენის კუთხით.
EuroGeorgaphics-თან პარტნიორობის დახმარებითა და საჯარო რეესტრის ეროვნული სააგენტოს ძალისხმევით, საქართველოს გეოგრაფიული მონაცემები ევროპულ სივრცეში განთავსდა. დღეს ეს ინფორმაცია ერთადერთია, რომლითაც ევროპული ინსტიტუტები საქართველოსთან მიმართებაში ხელმძღვანელობენ.
EuroGeorgaphics ევროპის ნაციონალური ტოპოგრაფიული, საკადასტრო და მიწის რეგისტრაციის ასოციაციაა, რომელშიც 43 ქვეყნის 52 ეროვნული კარტოგრაფიისა და კადასტრის სააგენტოა გაერთიანებული. მისი საქმიანობა ევროპის გეოსივრცითი მონაცემების ერთიანი ინფრასტრუქტურის მხარდაჭერისკენ არის მიმართული.
პროექტები:
· სააგენტომ 2011 წელს ორგანიზაციასთან ერთად დაიწყო EuroGlobalMap (EGM) - ევროპის გლობალური რუკის პროექტის განხორციელება. პროექტი ევროპის გლობალური რუკისთვის 1:1 000 000 მასშტაბის ციფრული ტოპოგრაფიული გეომონაცემთა ბაზის შექმნასა და ევროპის ერთიან მონაცემთა ბაზაში ინტეგრირებას ითვალისწინებდა.
2011 წელს დაიწყო და კვლავაც გრძელდება EuroRegionalMap (ERM) - ევროპის რეგიონალური რუკის პროექტი, რომელიც 1:100 000 მასშტაბის გემონაცემთა ბაზის შექმნას ითვალისწინებს. ბაზაში თავს უამრავი მონაცემი იყრის, მათ შორის, ინფორმაცია სატრანსპორტო ქსელის, ჯანდაცვის, საგანმანათლებლო, გარემოს დაცვის ობიექტების ა.შ. შესახებ. პროექტის ფარგლებში, ინფორმაციის მოძიების მიზნით, საჯარო რეესტრის ეროვნული სააგენტო სხვა სახელმწიფო უწყებებთანაც თანამშრომლობს. მიღებული ინფორმაცია EuroGeorgaphics-ის წესებისა და სტანდარტების შესაბამისად ტრანსფორმირდება და ევროპის ერთიან მონაცემთა ბაზაში ინტეგრაციისთვის იგზავნება. სააგენტო აღნიშნულ პროექტზე მუდმივად მუშაობს: EuroGeorgaphics-ის მოთხოვნების შესაბამისად, ბაზის განახლება, მისი სხვადასხვა ინფორმაციით შევსება და რუკის მომდევნო ვერსიების შექმნა სისტემატურად ხდება.
