27 სექტემბერს, ფინანსთა მინისტრმა ნოდარ ხადურმა და მინისტრის მოადგილეებმა, პატივი მიაგეს საქართველოს ტერიტორიული მთლიანობისათვის ბრძოლებში დაღუპულ მებრძოლთა ხსოვნას და გმირთა მოედანზე გვირგვინით შეამკეს დაღუპულ გმირთა მემორიალი.
„დღეს, ჩვენი ქვეყნის ისტორიაში, ალბათ, ერთ-ერთი ყველაზე მძიმე დღეა. 21 წლის წინ უამრავი ჩვენი თანამოქალაქე შეეწირა საქართველოს ერთიანობისთვის ბრძოლას. ღრმად ვარ დარწმუნებული, რომ არც ერთი წვეთი სისხლი, რომელიც ამ ბრძოლაში დაიღვარა, უკვალოდ არ ჩაივლის. ჩვენ აუცილებლად დავბრუნდებით, დავიბრუნებთ ჩვენს ძმებსა და დებს და ერთად ავაშენებთ ძლიერ საქართველოს," - განაცხადა ფინანსთა მინისტრმა ნოდარ ხადურმა.
სოხუმის დაცემის 21 წლისთავთან დაკავშირებით გმირთა მოედანზე "ყოველთა მწუხარეთა სიხარულის" ღვთისმშობლის ხატი მიაბრძანეს, რომელიც პატრიარქის კურთხევით, აფხაზთა და ქართველთა შერიგებისათვის დაიწერა.
ფინანსთა მინისტრი დაესწრო აფხაზეთში დაღუპულ გმირთა სულების მოსახსენებელ პანაშვიდს, რომელიც უწმიდესმა და უნეტარესმა, სრულიად საქართველოს კათოლიკოს-პატრიარქმა, მცხეთა-თბილისის მთავარეპისკოპოსმა და ბიჭვინთისა და ცხუმ-აფხაზეთის მიტროპოლიტმა ილია II-მ აღავლინა.
მასალის გამოყენების პირობები
