სოხუმის დაცემის დღესთან დაკავშირებით, თბილისის მერმა დავით ნარმანიამ და დედაქალაქის მთავრობის წევრებმა გმირთა მოედანზე, საქართველოს ტერიტორიული მთლიანობისთვის დაღუპულთა მემორიალი გვირგვინით შეამკეს.
„ძალიან მძიმე და რთულად მოსაგონარი დღეა, თუმცა, მიუხედავად ყველაფრისა, ჩვენ უნდა გავიხსენოთ ის ადამიანები, ვინც თავი შესწირა ჩვენი ქვეყნის ერთიანობას და სისხლის უკანასკნელ წვეთამდე იბრძოლა. მათი სახელების უკვდავსაყოფად, დაღუპულთა გმირობის შესახებ აუცილებლად უნდა მოვუყვეთ მომავალ თაობას," - განაცხადა დავით ნარმანიამ. მისივე თქმით, თბილისის მერია ვეტერანთა დეპარტამენტან ერთად დაღუპულთა ოჯახებს დაეხმარება. იგეგმება დაღუპულთა სახელობის პარკებისა და სკვერების კეთილმოწყობა.
გმირთა მემორიალზე მისვლამდე, დილიდან, თბილისის მერი დავით ნარმანია საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრ სოზარ სუბართან ერთად, საქართველოს ეროვნული გმირის, ჟიული შარტავას საფლავზე მივიდა და პატივი მიაგო მის ხსოვნას.
დავით ნარმანიას თქმით, ჟიული შარტავამ შესანიშნავი გმირობის მაგალითი დაუტოვა მომავალ თაობას იმისა, თუ როგორი უნდა იყოს ქვეყნის ერთიანობისთვის მზრუნველი ჭეშმარიტი პატრიოტი.
