ქართული ენის (აფხაზეთში - აგრეთვე, აფხაზური ენის) სახელმწიფო სტატუსის განმტკიცება და სახელმწიფოებრივი და საზოგადოებრივი ცხოვრების ყველა სფეროში მის გამოყენებაზე, დაცვაზე, განვითარებაზე, შესწავლასა და პოპულარიზაციაზე განუხრელად ზრუნვა მალე კანონმდებლობით განისაზღვრება. კანონპროექტის „სახელმწიფო ენის შესახებ" საკომიტეტო მოსმენები უკვე დაწყებულია.
წარდგენილი პროექტით განისაზღვრება სახელმწიფო ენის სტატუსი, მისი დაცვის გარანტიები, სახელმწიფო და სხვა ენის გამოყენების თავისებურებები, განათლების ენის არჩევის შესაძლებლობა, სახელმწიფო ენის გამოყენების პრინციპები და სხვა საკითხები. კანონპროექტი მხოლოდ სახელმწიფო და არასახელმწიფო ენების ცნებებს განსაზღვრავს, მისი რეგულირების სფერო სახელმწიფო ენის რეგულირების ფარგლებს მოიცავს. ყურადღება ეთმობა სახელმწიფო ენის პოპულარიზაციისა და შესწავლის პრობლემას, სახელმწიფო ენის სპეციალური პროგრამების მომზადებასა და განხორციელებას. პროექტით ენობრივი პოლიტიკის განხორციელების მთავარ წარმმართველ ორგანოებად საქართველოს პარლამენტი და მთავრობა სახელდება. განსაზღვრულია სახელმწიფო ენის დეპარტამენტის და სახელმწიფო ენის მუდმივმოქმედი კომისიის შექმნა, ასევე, პასუხისმგებლობის ზომები და ფულადი სანქციები "სახელმწიფო ენის შესახებ" კანონის მოთხოვნათა დარღვევისათვის.
მასალის გამოყენების პირობები
