სოფელ მახოსთან მდინარე ჭოროხმა 40 წლამდე მამაკაცის გვამი გამორიყა. აჭარის საგანგებო და გადაუდებელი სიტუაციების მართვის სააგენტოს ხელმძღვანელის მამუკა თურმანიძის განმარტებით, გვამი ამოცნობილია და ის სოფელ მახოს მკვიდრია. მისივე განმარტებით, ცხედარი ამ დროისათვის ექსპერტიზა უტარდება და სწორედ ექსპერტიზა დაადგენს თუ როდის მოხდა მისი გარდაცვალაბა. თუმცა როგორც თურმანიძე განმარტავს, ამ ადამიანის გაუჩინარების შესახებ ოფიციალური ინფორმაცია უწყებას არ ქონია.
იმავდროულად, მაშველები ამ დრომდე ეძებენ ქობულეთში, გუშინ შტორმის დროს ზღვაში გაუჩინარებულ მამაკაცს. თუმცა როგორც აჭარის საგანგებო და გადაუდებელი სიტუაციების მართვის სააგენტოს ხელმძღვანელი აცხადებს, ზღვაში სამძებრო სამუშაოების ჩატარება, ზღვის ღელვის და დაბალი ხილვადობის გამო ვერ ხერხდება. მაშველები სანაპიროდან აწარმოებენ დაკვირვებას, ხოლო მას შემდეგ რაც ზღვაზე ხილვადობა აღდგება, სამძებრო სამუშაოებიც დაიწყება.