თბილისის მერია „სითი პარკთან" დადებული ხელშეკრულების შესასწავლად კვალიფიციურ საერთაშორისო აუდიტორულ კომპანიას მოიწვევს. როგორც თბილისის მერმა, დავით ნარმანიამ მთავრობის სხდომის დასრულების შემდეგ განაცხადა, კომპანია „სითი პარკთან" გაფორმებული ხელშეკრულების ანალიზს გააკეთებს და შესაბამის დასკვნას წარმოადგენს.
„მას შემდეგ, რაც ჩვენ დეტალურად შევისწავლეთ „სითი პარკისგან" მიღებული ინფორმაცია, მივიღეთ გადაწყვეტილება, რომ საჭიროა, ხელშეკრულებაზე სამართლებრივი და ფინანსური დასკვნა კვალიფიციურმა აუდიტორულმა კომპანიამ მოამზადოს, ამიტომ აუდიტორული კომპანიის შესარჩევად გამოცხადდება კონკურსი. ჩვენ ვითხოვთ ცენტრალური მთავრობისგან გამარტივებული შესყიდვის უფლებას, რომლის საფუძველზეც გამოვცხადებთ კონკურსს და გამოვლინდება კომპანია, რომელიც შესაბამის მომსახურებას გაგვიწევს", _ განაცხადა დავით ნარმანიამ. თბილისის მერის თქმით, ხელშეკრულებასთან დაკავშირებით კვალიფიციური დასკვნის წარსადგენად გამარჯვებულ კომპანიას 4-კვირიანი ვადა მიეცემა.