„ბოშების ბაზრის ადმინისტრაციას ეკისრება პასუხისმგებლობა, რომ დაზარალებულები ალტერნატიული ფართით უზრუნველყოს", - ამის შესახებ თბილისის მერმა, დავით ნარმანიამ მთავრობის სხდომის დასრულების შემდეგ ჟურნალისტებს განუცხადა. მისი თქმით, საფუძველსმოკლებულია განცხადებები იმის შესახებ, რომ დაზარალებულებზე დაფინანსება მერის სარეზერვო ფონდიდან უნდა გაიცეს.
„ეს არის სახელშეკრულებო ურთიერთობა ბაზრობის ადმინისტრაციასა და დასაქმებულ ადამიანებს შორის. დიდუბის გამგებელი ყოველდღიურად ჩართულია ამ საკითხების მოგვარებაში და ჩვენ მათ მოლაპარაკებების პროცესში ვეხმარებით. როგორც დღეს გამგებელმა მომაწოდა ინფორმაცია, ბაზრობის ადმინისტრაცია კომერციული ბანკიდან დღე-დღეზე ელოდება დაფინანსებას, რომ დაზარალებული ადამიანები დააკმაყოფილოს", - განაცხადა დავით ნარმანიამ. გარდა ამისა, თბილისის მერის თქმით, თბილისის მერია სწრაფ რეჟიმში გასცემს ნებართვას ალტერნატიულ ტერიტორიაზე ბაზრობის გამართვასთან დაკავშირებით.
რაც შეეხება ბაზრობის მიმდებარედ ხანძრისგან დაზიანებულ სახლებს, თბილისის მერიამ საცხოვრებელი სახლების დაზიანებული სახურავების შესაკეთებლად 18 150 ლარი მთავრობის წინა სხდომაზე უკვე გამოყო.
