ჯანმრთელობის დაცვისა და სოციალურ საკითხთა კომიტეტის თავმჯდომარემ, დიმიტრი ხუნდაძემ სისხლის სამართლის კოდექსში დაგეგმილი ცვლილებები მედიის წარმომადგენლებს გააცნო, რომელიც კრიმინალურ აბორტებთან მიმართებაში სასჯელის გამკაცრებას ისახავს მიზნად.
ხუნდაძის განცხადებით, ქვეყნის დემოგრაფიული პოლიტიკის ერთ-ერთი შემადგენელი ნაწილი კრიმინალურ აბორტებთან დაკავშირებით საკანონმდებლო ინიციატივების წარდგენაა.
„უკანონო აბორტებთან მიმართებაში იყო ძალიან ლიბერალური დამოკიდებულება. სასჯელი, რომელსაც ახალი კანონპროექტი ითვალისწინებს, შესაბამისობაშია ჩადენილ დანაშაულთან", - განაცხადა ჯანმრთელობის დაცვისა და სოციალურ საკითხთა კომიტეტის თავმჯდომარემ.
საქართველოს პარლამენტის წევრების, დიმიტრი ხუნდაძისა და მირიან წიკლაურის მიერ მომზადებული კანონპროექტის მიხედვით, უკანონო აბორტი ისჯება საზოგადოებისთვის სასარგებლო შრომით 120-დან 300 საათამდე ან თავისუფლების აღკვეთით 1-დან დან 2 წლამდე. იგივე ქმედება, ჩადენილი უკანონო აბორტისათვის მსჯავრდებულის მიერ, ან რამაც გამოიწვია შვილოსნობის სამუდამო მოშლა, ან სხვა მძიმე შედეგი, ისჯება თავისუფლების აღკვეთით ვადით 2- დან 5 წლამდე, თანამდებობის დაკავების ანდა საქმიანობის უფლების ჩამორთმევით, ვადით 3 წლამდე.
aსევე, მკაცრდება ნორმები იმ შემთხვევაში, თუ უკანონო აბორტი სიცოცხლის მოსპობას გამოიწვევს. „ჩვენ გავითვალისწინეთ, რომ კანონპროექტი პაციენტსა და საექიმო საქმიანობას ეხება, ამიტომ, იურიდიულ საკითხთა კომიტეტის ინიციატივით, კანონი მიღებიდან მე-15 დღეს ამოქმედდება, რომ ინფორმაცია ამის შესახებ უფრო მეტად იყოს ხელმისაწვდომი", - აღნიშნა ჯანმრთელობის დაცვისა და სოციალურ საკითხთა კომიტეტის თავმჯდომარემ.
დღეს გამართულ პრესკოინფერნციაზე ხუნდაძემ სტატისტიკური მონაცემებიც წარმოადგინა.
მისი ცნობით, 2012 წელს აღრიცხული აბორტების რიცხვმა 40 000 შეადგინა, თუმცა, არ არსებობს აღურიცხავი აბორტების რაოდენობის ამსახველი მონაცემები.
მისივე თქმით, საქართველოში დღეში, სავარაუდოდ, 100-150 აბორტი კეთდება, რაც საგანგაშო მონაცემებია. ჯანმრთელობის დაცვისა და სოციალურ საკითხთა კომიტეტის თავმჯდომარის ინფორმაციით, დაიწია პირველი აბორტის ასაკმა, ხოლო კონტრაცეპტივების მოხმარება შემცირდა, რაც, დიმიტრი ხუნდაძის განმარტებით, საზოგადოების ნაკლები ინფორმირებულობის შედეგია.
მასალის გამოყენების პირობები