„2014 წელს საქართველოს ეკონომიკური თავისუფლების მაჩვენებლის მიხედვით საუკეთესო შედეგი ჰქონდა - Heritage Foundation-ის ეკონომიკური თავისუფლების კვლევის მონაცემებით, საქართველოს ეკონომიკა რეზისტენტულობის მაღალი მაჩვენებლით ხასიათდება. საქართველომ 2014 წელსაც შეინარჩუნა „ძირითადად თავისუფალი" ქვეყნის ინდექსი"- აღნიშნა ქვეყნის პრემიერ-მინისტრმა ირაკლი ღარიბაშვილმა ათასწლეულის განვითარების მიზნების საქართველოს ეროვნული ანგარიშის პრეზენტაციისას.
პრემიერის თქმით, კორუფციის აღმოფხვრასა და ფისკალური სტაბილურობის აღდგენაზე მიმართულმა გეგმაზომიერმა მუშაობამ სათანადო შედეგი გამოიღო. მნიშვნელოვნად გაადვილდა იურიდიულ დოკუმენტებზე წვდომა, ფისკალური კონსოლიდაციის შედეგად შემცირდა საბიუჯეტო დეფიციტი და სახელმწიფო ვალი.
„მიუხედავად ჩამოთვლილი მიღწევებისა, ჩვენ წინაშე კიდევ მრავალი გამოწვევა რჩება. მათ შორისაა ისეთი მნიშვნელოვანი გამოწვევა, როგორიცაა ბავშვთა სიღარიბის შემცირება. ჩვენ ვიღებთ ამ გამოწვევებს და ვცდილობთ გამოვნახოთ მათი გადაჭრის ეფექტიანი გზები. პარალელურად, მსოფლიოში მიმდინარეობს დისკუსია ახალ, მდგრადი განვითარების მიზნებზე, რომელშიც საქართველოც აქტიურად მონაწილეობს.
საქართველოში ათასწლეულის განვითარების მიზნების შესრულების პროცესმა გვიჩვენა, რომ გლობალურ ცვლილებებს, გლობალური თანამშრომლობის გარდა, სჭირდება ძლიერი და გამჭვირვალე ანგარიშვალდებულების მექანიზმები. საქართველოს მთავრობამ სწორედ ამ მექანიზმების შემუშავებაში მიიღო მონაწილეობა 15-16 სექტემბერს ჟენევაში, გაეროს ეგიდით გამართულ მაღალი დონის მინისტერიალში. მთავრობის ინიციატივები და რეფორმები უნდა ითვალისწინებდეს 2015 წლის შემდეგ მსოფლიოს მდგრადი განვითარების მიზნებსაც, რაზეც საქართველოს მთავრობა აქტიურად მუშაობს.
დაბოლოს, მინდა მადლობა გადავუხადო ჩვენს სამინისტროებს, გაეროს ადგილობრივ წარმომადგენლობას და მის სპეციალიზებულ სააგენტოებს, არასამთავრობო სექტორს და ყველას, ვინც წვლილი შეიტანა ამ ანგარიშის მომზადებაში. ეს არის კიდევ ერთი თვალსაჩინო მაგალითი იმისა, თუ რა შედეგი მოაქვს დასახული მიზნის გარშემო გაერთიანებას"- განაცხადა ღარიბაშვილმა.
