„2014 წელს შრომის კოდექსში შევიდა ცვლილებები, რომელიც შეეხება ისეთ საკითხებს, როგორიცაა ოფიციალური შვებულება ორსულობასთან, მშობიარობასა და ბავშვის აღზრდასთან დაკავშირებით", - აღნიშნულის შესახებ განცხადება ქვეყნის პრემიერ-მინისტრმა ირაკლი ღარიბაშვილმა ათასწლეულის განვითარების მიზნების საქართველოს ეროვნული ანგარიშის პრეზენტაციაზე სიტყვით გამოსვლისას გააკეთა.
პრემიერის განმარტებით, ზემოაღნიშნული ცვლილებების შესაბამისად გაიზარდა შვებულების დღეების რაოდენობა, მათ შორის ანაზღაურებული შვებულების დღეების რაოდენობა და თანხა.
„2013 წელს პრემიერ-მინისტრის აპარატის შემადგენლობაში შევიყვანეთ მრჩეველი ადამიანის უფლებების და გენდერული თანასწორობის საკითხებში, რაც არსებითად შეუწყობს ხელს გენდერულ და ქალების უფლებების გაზრდასთან დაკავშირებული საკითხების ეფექტიანად გადაჭრას.
ეკოლოგიური მდგრადობის განვითარების პრინციპების ინტეგრირება ქვეყნის პოლიტიკასა და პროგრამებში ათასწლეულის ეროვნულ მიზანს წარმოადგენდა.
წყლის რესურსების ინტეგრირებული მართვის სისტემის დანერგვისათვის სამართლებრივი საფუძვლების შექმნის მიზნით მზადდება „წყლის რესურსების მართვის შესახებ" კანონპროექტი, რომელიც ემყარება წყლის რესურსების სააუზო მართვის ევროპულ პრინციპებს და ითვალიწინებს მსოფლიოს განვითარებულ ქვეყნებში აპრობირებულ და საერთაშორისოდ აღიარებულ თანამედროვე მოთხოვნებს.
ჩვენ დავიწყეთ მუშაობა ქვეყნის გარემოსდაცვითი საქმიანობის ეფექტიანობის შეფასების დოკუმენტზე. ექსპერტები შეაფასებენ გარემოსდაცვითი მმართველობის სფეროში არსებულ ვითარებას. გაანალიზდება, თუ რამდენად შესრულდა წინა შეფასების რეკომენდაციები, აგრეთვე მიღწეული პროგრესი და მომზადდება ახალი რეკომენდაციები ქვეყანაში გარემოსდაცვითი მმართველობის გაუმჯობესების კუთხით", - აღნიშნა ღარიბაშვილმა.