"არსებითად შემცირდა სიღარიბეში მცხოვრები მოსახლეობის რაოდენობა და ეს მაჩვენებელი პრაქტიკულად განახევრებულია", - აღნიშნულის შესახებ განცხადება ქვეყნის პრემიერ-მინისტრმა ირაკლი ღარიბაშვილმა ათასწლეულის განვითარების მიზნების საქართველოს ეროვნული ანგარიშის პრეზენტაციაზე სიტყვით გამოსვლისას გააკეთა.
როგორც მთავრობის მეთაურმა განმარტა, რომ სკოლამდელი განათლება უკვე ბავშვების 46%-ისთვის არის ხელმისაწვდომი, მაშინ როდესაც 2003 წელს ეს მაჩვენებელი 26%-ს შეადგენდა.
„მოსახლეობის სოციალური მდგომარეობის გაუმჯობესებისათვის, უმნიშვნელოვანესი მიღწევა იყო 2013 წელს საყოველთაო ჯანდაცვის პროგრამის დანერგვა, რომელმაც დაზღვევის არმქონე ყველა საქართველოს მოქალაქე უზრუნველყო სამედიცინო მომსახურებით. ამჟამად მსოფლიო ბანკთან ერთად მიმდინარეობს მუშაობა საქართველოში ხარისხის მართვის ერთიანი სისტემის ამოქმედებასთან დაკავშირებით.
გაეროს ბავშვთა ფონდის დახმარებით მიმდინარეობს მუშაობა ოჯახების სოციალურ-ეკონომიკური მდგომარეობის შეფასების მეთოდოლოგიისა და ადმინისტრირების სქემის დახვეწის მიმართულებით, ბავშვებისა და ბავშვიანი ოჯახების საჭიროებების ასახვისა და სოციალური დახმარების პროგრამის მიზნობრიობის ზრდის მიზნით"- აღნიშნა ღარიბაშვილმა.
მისივე თქმით, ქვეყანაში პრაქტიკულად დამარცხებულია მალარია, ხოლო მნიშვნელოვნად შემცირებულია ტუბერკულოზის ახალი შემთხვევებით ავადობა; განახევრებულია დედათა სიკვდილიანობა.
„განათლება ქვეყნის განვითარების ყველაზე მყარი და მნიშვნელოვანი საფუძველია. სწორედ ამიტომ, ჩვენ განათლებას განსაკუთრებულ ყურადღებას ვუთმობთ. ჩვენ მიერ გატარებული რეფორმების საფუძველზე სკოლამდელი აღზრდა უფასო გახდა, ფართომასშტაბიანი პროგრამების განხორციელებით თითქმის 60%-მდე შემცირდა ოჯახის წლიური დანახარჯები ზოგად განათლებაზე. ეტაპობრივად იხსნება ახალი პროფესიული საგანმანათლებლო დაწესებულებები, რათა გაიზარდოს პროფესიული განათლების გეოგრაფიული არეალი და, შესაბამისად, ამ განათლებისადმი მისაწვდომობა.
ჩვენი უშუალო ინიციატივით შექმნილი საერთაშორისო განათლების ცენტრი ემსახურება სახელმწიფოს მიერ საერთაშორისო დონის მაღალკვალიფიციური კადრების მომზადებას, რომლებიც საჯარო სექტორში დასაქმდებიან და საკუთარ წვლილს შეიტანენ საჯარო მმართველობაში.
განსაკუთრებული ყურადღება ეთმობა შეზღუდული შესაძლებლობების მქონე ბავშვების განათლებას: 2012 წლიდან ინკლუზიური განათლება საქართველოს ყველა საჯარო სკოლისთვის სავალდებულო გახდა"- განაცხადა ღარიბაშვილმა.
