საქართველოს კულტურისა და ძეგლთა დაცვის საინისტრო ღრმა მწუხარებით იუწყება, რომ გარდაიცვალა ცნობილი ქართველი გრაფიკოსი და მხატვარ-მონუმენტალისტი ემირ ბურჯანაძე.
წიგნის და არა მარტო წიგნის გაფორმებასთან იყო დაკავშირებული ემირ ბურჯანაძის მრავალწლიანი შრომა. მისი თაოსნობით ქართულ დიზაინში შეიქმნა პირველი ეროვნული საფირმო, სასაქონლო და სარეკლამო ნიშნები, სხვადასხვა ტიპის სიმბოლური ემბლემები.
ემირ ვალერიანის ძე ბურჯანაძე დაიბადა 1937 წლის 1 მაისს თბილისში. 1957-1964 წლებში სწავლობდა თბილისის სახელმწიფო სამხატვრო აკადემიის გრაფიკის ფაკულტეტზე.
1962-1969 წლებში მუშაობდა ტექნიკური ესთეტიკის საკავშირო ინსტიტუტის საქართველოს ფილიალში, სამრეწველო გრაფიკის განყოფილების მხატვარ - კონსტრუქტორად.
1973 წელს მუშაობდა თბილისის სახელმწიფო სამხატვრო აკადემიაში, ხელმძღვანელობდა შრიფტის სამეცნიერო კვლევით ლაბორატორიას. შექმნილი აქვს ქართული მხატვრული შრიფტები: სატიტულო, სარეკლამო და საპროექტო. ქართული ჩართული ანბანის (მონოგრამების) სრული ციკლი, შექმნილი აქვს გერბები, საფირმო სასაქონლო ნიშნები და ემლემები.
ემირ ბურჯანაძე იყო საქართველოს სახელმწიფოებრიობის 3000 წლისადმი და ქრისტეშობის 2000 წლისადმი მიძღვნილი საიუბილეო 10 ლარიანი მონეტების შემქმნელი.
1970 წლიდან მხატვარი მუშაობდა თბილისის სიმბოლიკაზე: თბილისის გერბი და გერბის ვარიანტები, თბილისის დროშა, თბილისის გასაღები, თბილისის სიმბოლო, თბილისის საპატიო მოქალაქის მედალი და დიპლომი, სრულიად საქართველოს კათოლიკოს პატრიარქის ილია მეორის პირადი ნიშნები და ორდენი და სხვა.
2005 წელს ცნობილი მხატვარი თბილისის საპატიო მოქალაქე გახდა.
