„რუსი ოკუპანტების პროფესიული არმიის წინაღმდეგ ჩვენთან ხშირად მოხალისეთა ბატალიონები იბრძვიან. როგორ ცხოვრობენ მოხალისეები, ამის შესახებ ჩვენ ქართული არმიის პოლკოვნიკი დოდო გვესაუბრება, რომელიც „პრავი სექტორის" (მარჯვენა სექტორის") მოხალისეთა ბატალიონის ინსტრუქტორია", - ამბობს უკრაინული სადღეღამისო ტელეკომპანია „24"-ის პროგრამის წამყვანი ჯერ უკრაინულ ენაზე, შემდეგ კი სტუდიის სტუმარს, სახელად დოდოს რუსულად მიმართავს და სთხოვს შთაბეჭდილებები გაუზიაროს.
პოლკოვნიკ დოდოს თქმით, უკრაინელი ბიჭები აფხაზეთის 1992-93 წლების ბრძოლებში საქართველოს ძალიან დაეხმარნენ და ისინი, ვინც დღეს რუსეთის წინააღმდეგ იბრძვიან, გმირები არიან. როგორც დოდომ არნიშნა, რომ „პრავიი სექტორის" ბატალიონს პატრიოტი და გმირი დიმიტრი იაროში ხელმძღვანელობს. „ჩვენ მაიდნიდან ვმეგობრობთ. ეს ადამიანი არასდროს ამბობს „მე"-ს, იგი მუდამ „ჩვენ"-ობით საუბრობს. ბატალიონში ახალგაზრდები იბრძვიან, ყოველდღიურად იღუპებიან, მაგრამ იციან, რომ ერთიანი უკრაინისთვის კვდებიან. ისინი არასდროს იქნებიან მუხლდაჩოქილნი... ამ თვალსაზრისით ქართველი და უკრაინელი ხალხი ერთი აზრისანი არიან".
პოლკოვნიკმა დოდომ ხაზი გაუსვა: „რუსებს ჩვენ უკრაინაშიც შევაჩერებთ და საქართველოშიც. ეს იქნება ჩვენი ერთობლივი გამარჯვება".
შენიშვნა: ვიდეოსიუჟეტში სტუდიის სტუმრის გვარი დასახელებული არ არის, თუმცა პოლკოვნიკი დოდო - ეს დოდო გუგეშაშვილია.